Parag Shah : राज्यातला सर्वात श्रीमंत उमेदवार भाजपचा, 2,187 कोटींची संपत्ती, 5 वर्षात 10 पट वाढ

पराग शहा यांनी उमेदवारी अर्ज दाखल करताना त्यांची संपत्तीची माहिती प्रतिज्ञापत्रात दिलीय. त्यांच्याकडे २ हजार १७८ कोटी रुपयांची संपत्ती आहे. तर पत्नीच्या नावावर १ हजार १३६ कोटी रुपयांची संपत्ती आहे. यामध्ये बहुतांश संपत्ती ही शेअर्स आणि गुंतवणूक स्वरुपात आहे. पराग शहा यांच्या नावावर ३१ कोटी किंमतीची मालमत्ता आहे तर पत्नीच्या नावे ३४.१७ कोटींची मालमत्ता आहे. पराग शहांवर एक लाखाचे तर पत्नीच्या नावावर ३६.९० लाखांचं कर्ज आहे.

advertisement

२०१९ च्या तुलनेत पराग शहा यांची संपत्ती दहा पट वाढलीय. २०१९ मध्ये त्यांची संपत्ती २३९ कोटी तर पत्नीची संपत्ती १६० कोटी इतकी होती. तर कौटुंबिक मालमत्ता २३ कोटी इतकी होती. पराग शहा यांची स्थावर मालमत्ता ३० कोटी आणि पत्नीकडे असलेली स्थावर मालमत्ता ३६.६४ कोटी रुपये किंमतीची होती.

पराग शहांनंतर श्रीमंत उमेदवारांमध्ये मंगल प्रभात लोढा यांचा नंबर लागतो. मलबार हिल मतदारसंघाचे आमदार असलेल्या आणि सध्या पर्यटन मंत्री असणाऱ्या मंगल प्रभात लोढा यांनी त्यांची संपत्ती ४३६ कोटी ८० लाख ५९१ इतकी असल्याचं सांगितलंय. यात जंगम मालमत्ता १२३ कोटी ३९ लाख रुपये इतकी आहे. तर स्थावर मालमत्ता १२५ कोटी ५४ लाख रुपयांची आहे. मंगल प्रभात लोढा यांच्यावर जवळपास १८२ कोटी रुपयांचे कर्ज आहे. शेअर्स, सोने यातील गुंतवणूक जवळपास ११ कोटी रुपये इतकी आहे. पाच वर्षांत त्यांच्या संपत्तीत घट झाल्याचं समोर आलंय. २०१९ च्या निवडणुकीत लोढा यांनी त्यांची संपत्ती ४४१ कोटींपेक्षा जास्त असल्याचं जाहीर केलं होतं.