TRENDING:
मृत उमेदवाराचे नाव दीपक भास्कर वाव्हाळ (रा. परळी, जि. बीड) असे आहे. पोलिस दलात भरती होण्याचे स्वप्न उराशी बाळगून दीपक परळीहून बीड येथे भरती प्रक्रियेसाठी आला होता. पोलीस भरती अंतर्गत सुरू असलेल्या शारीरिक चाचणीत 1600 मीटर धाव ही महत्त्वाची परीक्षा असते. रणरणत्या उन्हात ही धाव पूर्ण करत असताना दीपकला अचानक चक्कर आली आणि तो धावत असतानाच जमिनीवर कोसळला.
advertisement
कुटुंबावर दुःखाचा डोंगर
घटनेनंतर तत्काळ उपस्थित कर्मचाऱ्यांनी त्याला उपचारासाठी रुग्णालयात दाखल केले. मात्र, उपचारादरम्यान त्याचा मृत्यू झाला अन् डॉक्टरांनी दीपकला मृत घोषित केले. या घटनेमुळे भरती केंद्रावर एकच खळबळ उडाली. दीपकच्या आकस्मिक मृत्यूमुळे त्याच्या कुटुंबावर दुःखाचा डोंगर कोसळला असून, परिसरात शोककळा पसरली आहे.
उमेदवारांची मोठ्या प्रमाणात दमछाक
सध्या राज्यभरात उन्हाचा तीव्र तडाखा जाणवत आहे. अशा परिस्थितीत 1600 मीटर धावण्याची परीक्षा घेण्यात येत असल्याने उमेदवारांची मोठ्या प्रमाणात दमछाक होत आहे. काही ठिकाणी उमेदवारांना चक्कर येणे, थकवा जाणवणे, रक्तदाब कमी होणे अशा तक्रारी समोर येत आहेत. या पार्श्वभूमीवर पोलीस भरतीदरम्यान आवश्यक त्या वैद्यकीय सुविधा, पुरेशी विश्रांती, पिण्याच्या पाण्याची व्यवस्था तसेच वेळापत्रकात बदल करण्याची गरज व्यक्त केली जात आहे.
भरती प्रक्रियेच्या सुरक्षिततेबाबत गंभीर प्रश्न
दीपक वाव्हाळच्या मृत्यूमुळे भरती प्रक्रियेच्या सुरक्षिततेबाबत गंभीर प्रश्न निर्माण झाले आहेत. भविष्यात अशा दुर्दैवी घटना टाळण्यासाठी प्रशासनाने उपाययोजन करण्याची मागणी विविध स्तरातून होत आहे.