TRENDING:
पुणे आणि पिंपरी चिंचवड महापालिकेत भारतीय जनता पक्ष राष्ट्रवादी काँग्रेससोबत युती करणार नाही, असे मुख्यमंत्री फडणवीस यांनी स्पष्ट केल्यानंतर इतर पक्षांसोबत युती आघाडीची चाचपणी अजित पवार करीत आहेत. त्याचाच भाग म्हणून पुण्यात विविध पक्षांसोबत-नेत्यांसोबत बैठका संपन्न होत आहेत. यादरम्यान विविध इच्छुक उमेदवारांच्या मुलाखतही पार पडत आहेत. मंगळवारी पुण्यातील बारामती हॉस्टेल येथे पिंपरी चिंचवडमधील सामान्य महिलांनी पालिका निवडणुकीतील घराणेशाहीतील संभाव्य उमेदवाराविरोधात संताप व्यक्त केला.
advertisement
अण्णा बनसोडे यांचा मुलगा उमेदवार म्हणून आम्हाला चालणार नाही
पिंपरी चिंचवडमधील प्रभाग क्रमांक ९ मध्ये राष्ट्रवादीचे आमदार तथा विधानसभेचे उपाध्यक्ष अण्णा बनसोडे यांचे सुपु्त्र लढण्यासाठी इच्छुक आहेत. प्रभागात बनसोडे यांच्याकडून तशी तयारी देखील सुरू आहेत. मात्र बनसोडे यांच्या उमेदवारीवर स्थानिकांचा तीव्र आक्षेप आहे. अण्णा बनसोडे यांचा मुलगा उमेदवार म्हणून अजिबात चालणार नाही. आमच्या कष्टकरी लोकांमधूनच आम्हाला उमेदवार हवाय, असे महिलांनी मागणी केली. बारामती हॉस्टेल येथे येऊन महिलांनी आक्रमक पद्धतीने मागणी केली.
लाडकी बहीण म्हणता मग त्यांच्या मताला किंमत का देत नाही?
अजित दादा पवार आम्हाला भेटत नाहीत, विधानसभेवेळीही आम्हाला आश्वासन दिले होते. पण आम्हाला दिलेल्या आश्वासनाचा त्यांना विसर पडलेला दिसतोय. आम्हाला बनसोडे यांचा सुपुत्र उमेदवार म्हणून नकोय. आम्ही सगळ्या कष्टकरी स्त्रिया आहोत. आमच्या मधलाच कुणीतरी उमेदवार म्हणून हवाय. बाबा कांबळे आमच्यासाठी काम करतात. त्यांना पक्षाने उमेदवारी द्यायला हवी. आम्हाला आता चॉकलेट नकोय, असे म्हणत प्रभागातील स्त्रिया आक्रमक झाल्या होत्या. तसेच लाडकी बहीण म्हणता मग त्यांचे ऐकत का नाही? त्यांच्या मताला किंमत का देत नाही? अशा प्रश्नांच्या फैरीही त्यांनी झाडल्या.