TRENDING:
समोर आलेल्या माहितीनुसार, येरवडा परिसरातील या मोकळ्या जागेत पोलिसांनी जप्त केलेली तसेच पार्किंगसाठी ठेवलेली मोठ्या प्रमाणावर वाहने उभी करण्यात आली होती. अचानकपणे या ठिकाणी आग लागल्याने काही मिनिटांतच आगीने रौद्ररूप धारण केले. एकामागोमाग एक वाहनांना आग लागत गेल्याने संपूर्ण परिसरात धुराचे दाट लोट पसरले होते. आगीची तीव्रता इतकी होती की काही अंतरावरूनही धुराचे लोट स्पष्टपणे दिसत होते.
advertisement
बहुतांश वाहने पूर्णपणे जळून खाक
आगीची माहिती मिळताच येरवडा अग्निशमन केंद्रासह पुणे महापालिकेच्या विविध अग्निशमन दलांच्या गाड्या घटनास्थळी दाखल झाल्या. तत्काळ पाण्याचे फवारे मारून आग आटोक्यात आणण्याचे प्रयत्न सुरू करण्यात आले. काही तासांच्या अथक प्रयत्नांनंतर आग नियंत्रणात आणण्यात यश आले. मात्र तोपर्यंत बहुतांश वाहने पूर्णपणे जळून खाक झाली होती.
महागड्या चारचाकी गाड्यांचाही समावेश
या घटनेत कोणतीही जीवितहानी झाली नसल्याचे प्राथमिक माहितीतून स्पष्ट झाले असले तरी मोठ्या प्रमाणावर आर्थिक नुकसान झाल्याचा अंदाज वर्तवण्यात येत आहे. जळून गेलेल्या वाहनांमध्ये काही महागड्या चारचाकी गाड्यांचाही समावेश असल्याने नुकसान लाखांच्या घरात जाण्याची शक्यता आहे.
सीसीटीव्ही फुटेजच्या आधारे तपास सुरू
दरम्यान, आगीचे नेमके कारण अद्याप स्पष्ट झालेले नाही. शॉर्टसर्किट, ज्वलनशील पदार्थ किंवा इतर कोणत्याही कारणामुळे ही आग लागली असावी का, याबाबत तपास सुरू आहे. पोलिस आणि अग्निशमन विभागाकडून घटनास्थळी पाहणी करून पंचनामा करण्यात येत असून सीसीटीव्ही फुटेजच्या आधारेही तपास केला जात आहे.
परिसरात काही काळ तणावाचे वातावरण
या घटनेमुळे येरवडा परिसरात काही काळ तणावाचे वातावरण निर्माण झाले होते. नागरिकांनी मोठ्या संख्येने घटनास्थळी गर्दी केली होती. पोलिसांनी तत्काळ बंदोबस्त ठेवून परिस्थिती नियंत्रणात आणली. पुढील तपास सुरू असून या आगीमागील नेमके कारण लवकरच स्पष्ट होण्याची शक्यता आहे.
हे ही वाचा :