TRENDING:
हिंदुत्ववादी विचारसरणीवर काम करणारे शिवप्रतिष्ठान हिंदुस्थानचे धारकरी लव जिहाद, गोरक्षा, धर्मसंवर्धन यांसह विविध सामाजिक व सांस्कृतिक मुद्द्यांवर सातत्याने सक्रिय असतात. सांगली शहरातही अनेक वर्षांपासून धारकरी कार्यकर्ते संघटनात्मक पातळीवर काम करत असतानाही महानगरपालिका निवडणुकीत त्यांच्या उमेदवारीचा गांभीर्याने विचार करण्यात आला नसल्याचा आरोप शिवप्रतिष्ठानकडून करण्यात येत आहे.
धारकरी राहुल बोळाज काय म्हणाले?
advertisement
या पार्श्वभूमीवर आज श्री शिवप्रतिष्ठान हिंदुस्थानचे धारकरी राहुल बोळाज यांनी आपला अपक्ष उमेदवारी अर्ज दाखल केला. उमेदवारी अर्ज दाखल केल्यानंतर बोलताना राहुल बोळाज यांनी भाजपवर थेट नाराजी व्यक्त केली. हिंदुत्वाच्या मुद्द्यावर आम्ही सातत्याने रस्त्यावर उतरून काम करत असताना भाजपने आमचा विचार केला नाही, अशी भावना त्यांनी यावेळी व्यक्त केली. भाजपने ज्या उमेदवारांना तिकीट दिले आहे, ते अनेक प्रभागांमध्ये जनतेच्या परिचयाचे नसल्याचा आरोपही त्यांनी केला.
शिवप्रतिष्ठान हिंदुस्थानने निवडणुकीच्या रिंगणात उतरण्याचा का निर्णय घेतला?
पक्षाने आमच्या कार्याची दखल घेतली नाही, तरीसुद्धा हिंदुत्वाचा आवाज बुलंद ठेवण्यासाठी आम्ही अपक्ष म्हणून निवडणुकीच्या रिंगणात उतरण्याचा निर्णय घेतला आहे, असे राहुल बोळाज यांनी स्पष्ट केले. शिवप्रतिष्ठान हिंदुस्थानचे धारकरी हे कोणत्याही राजकीय सौदेबाजीपेक्षा विचारधारेला प्राधान्य देतात, असेही त्यांनी यावेळी सांगितले.
सांगलीत भाजपला नवे आव्हान
दरम्यान, शिवप्रतिष्ठानच्या या भूमिकेमुळे सांगली महापालिका निवडणुकीत भाजपसमोर नवे आव्हान उभे राहिले आहे. अपक्ष म्हणून लढणाऱ्या धारकरी उमेदवारांना कितपत प्रतिसाद मिळतो, याकडे आता सर्वांचे लक्ष लागले असून, या घडामोडींमुळे निवडणुकीची रंगत आणखी वाढण्याची शक्यता व्यक्त केली जात आहे. या नव्या घडामोडीमुळे अवघ्या महाराष्ट्राचं लक्ष सांगलीकडे लागले आहे.
हे ही वाचा :