आदित्य ठाकरेंना वरळीत मोठा धक्का, 17 वर्षे सोबत असलेला शिलेदार अखेर बोलला, म्हणाला मला अंधारात...

आदित्य ठाकरे यांचा मतदारसंघ असलेल्या वरळीत राजीनामा सत्र सुरू असल्याचे पाहायला मिळाले आहे.

वॉर्ड क्रमांक 193 साठी पुन्हा एकदा हेमांगी वरळीकर यांनाच संधी दिली जाणार असल्याची माहिती समोर आल्यानंतर आपण नाराज झाल्याचे सूर्यकांत कोळी यांनी स्पष्ट केले आहे. अनेक वर्षांपासून पक्षासाठी काम करूनही संधी न मिळाल्याची खंत त्यांनी व्यक्त केली असून, कार्यकर्त्यांमध्ये असलेली अस्वस्थता आता उघडपणे समोर येत असल्याचे चित्र आहे.

कोळी यांच्या राजीनाम्यानंतर वरळी मतदारसंघात असलेल्या इतर शाखा प्रमुखांमध्येही असंतोष पसरल्याचे दिसून येत आहे. उमेदवारी ठरवताना स्थानिक कार्यकर्त्यांना डावलले जात असल्याचा आरोप काही पदाधिकाऱ्यांकडून केला जात असून नाराजी व्यक्त केली जात आहे.  दरम्यान, आशिष चेंबूरकर यांनीही त्यांच्या पत्नीसाठी तिकीट मागितल्याची चर्चा राजकीय वर्तुळात रंगली आहे. या मागणीमुळे इतर इच्छुक आणि पदाधिकारी अस्वस्थ झाले असून, पक्षाकडून सकारात्मक प्रतिसाद न मिळाल्यास आणखी काही जण राजीनामा देण्याच्या तयारीत असल्याची माहिती सूत्रांकडून मिळत आहे.

वरळी हा शिवसेनेसाठी (उद्धव बाळासाहेब ठाकरे गट) अत्यंत महत्त्वाचा मतदारसंघ मानला जातो. आमदार आदित्य ठाकरे यांचा हा बालेकिल्ला म्हणून ओळखला जात असताना, अशा प्रकारची अंतर्गत नाराजी पक्षासाठी डोकेदुखी ठरू शकते. स्थानिक पातळीवरील असंतोष वेळीच दूर केला नाही, तर त्याचा परिणाम निवडणुकीत दिसून येण्याची शक्यता आहे.

दरम्यान, पक्ष नेतृत्वाकडून अद्याप अधिकृत प्रतिक्रिया देण्यात आलेली नाही. मात्र, वाढती नाराजी आणि राजीनाम्यांचे सत्र थांबवण्यासाठी वरिष्ठ पातळीवर हालचाली सुरू झाल्याची चर्चा आहे. पुढील काही दिवसांत या नाराजीवर पक्ष कसा तोडगा काढतो, याकडे सर्वांचे लक्ष लागले आहे.