साताऱ्यातील महिला डॉक्टर आत्महत्या प्रकरणाने राज्यात एकच खळबळ उडाली होती. महिला डॉक्टरने हॉटेलच्या रुममध्ये आपल्या हातावर सुसाइड नोट लिहित आत्महत्या केली. आपल्याला शारिरीक आणि मानसिक अत्याचार केल्याने टोकाचे पाऊल उचलत असल्याचे तिने आपल्या सुसाइड नोटमध्ये म्हटले. ही घटना समोर आल्यानंतर संतापाची लाट उसळली. या प्रकरणातील दोन्ही आरोपींना अटक करण्यात आली असून पोलिसांकडून चौकशी सुरू आहे. मागील आठवड्यातील शुक्रवारी पहाटे पोलिसांनी प्रशांत बनकरला एका फार्महाऊसवर अटक केली. तर शनिवारी रात्री उशिरा गोपाल बदने याने पोलीस ठाण्यात स्वत:हून सरेंडर केले.
advertisement
हातावर लिहिलेली सुसाईड नोट
महिला डॉक्टर या काही दिवसांपासून वैद्यकीय तपासणीसंदर्भात पोलिसांशी झालेल्या वादामुळे सतत चौकशीला सामोऱ्या जात असल्याची माहिती समोर आली होती. “माझ्यावर अन्याय होत आहे, मी आत्महत्या करीन,” अशी तक्रार त्यांनी वरिष्ठ अधिकाऱ्यांकडे लेखी स्वरूपात दिल्याचे समजते. मात्र योग्य प्रतिसाद न मिळाल्याने त्यांनी आत्महत्या केली.
घटनास्थळी तपासादरम्यान महिला डॉक्टरांच्या हातावर लिहिलेली एक सुसाईड नोट आढळली. त्यात त्यांनी पोलिस PSI गोपाल बदने यांनी चार वेळा शारीरिक अत्याचार केल्याचा आणि प्रशांत बनकर यांने मानसिक छळ दिल्याचा गंभीर आरोप केला आहे. बनकर हा महिला डॉक्टर राहत असलेल्या घरमालकाचा मुलगा आहे. या खुलाशामुळे पोलिस यंत्रणा आणि आरोग्य प्रशासनात मोठी खळबळ उडाली आहे.
पोलिसांकडे पोस्टमार्टेम अहवाल, त्यात नेमकं काय?
आज पोलिसांकडे आत्महत्या केलेल्या महिला डॉक्टरचा पोस्टमार्टेम अहवाल सादर झाला आहे. महिला डॉक्टरची आत्महत्या नसून आत्महत्या केल्याचा आरोप करण्यात येत होता. या प्रकरणाची उच्चस्तरीय चौकशीची मागणी करण्यात आली. अशातच आता पोस्टमार्टेंम अहवाल समोर आला आहे. मृत महिला डॉक्टरांच्या शरीरावर इतर कोणतेही आघात नसल्याचे अहवालात नमूद करण्यात आले आहे. महिला डॉक्टरचा मृत्यू हा गळफास घेऊन झाल्याचे उघड झाले आहे. पोस्टमार्टेम अहवाल हा पोलिसांच्या पुढील तपासासाठी महत्त्वाचा ठरणार आहे.