सर्पदंश झाला तरी जिद्द सोडली नाही, परीक्षा द्यायला पोहोचला दहावीचा विद्यार्थी, लातूरमधील घटना!

श्रवण जगन्नाथ खाकरे असं या विद्यार्थ्याचं नाव आहे. तो लातूर जिल्ह्याच्या अहमदपूर तालुक्यातील माळेगाव खुर्दचा रहिवासी आहे. त्याला इंग्रजी विषयाच्या पेपरच्या आदल्या रात्री सापाने दंश केला होता. मृत्यू समोर दिसत असताना आणि शरीरात विषाचा प्रादुर्भाव असतानाही, केवळ वर्ष वाया जाऊ नये या काळजीपोटी श्रवणने रुग्णालयातून थेट परीक्षा केंद्र गाठले आणि इंग्रजीचा पेपर दिला आहे.

advertisement

नेमकी घटना काय?

शालेय जीवनात दहावीच्या बोर्ड परीक्षेला अत्यंत महत्त्व असतं. या बोर्ड परीक्षेमुळे करिअरला कलाटणी मिळत असते. गुरुवारी दहावी बोर्डाचा इंग्रजीचा पेपर होता. मात्र, बुधवारी रात्री श्रवणला अचानक सर्पदंश झाला. या घटनेनं कुटुंबात एकच खळबळ उडाली. परीक्षेची तयारी पूर्ण झाली असतानाच नियतीने हा घात केला होता. श्रवणला तातडीने अहमदपूर येथील खासगी रुग्णालयात दाखल करण्यात आले.

डॉक्टरांची रात्रभर झुंज

रुग्णालयातील डॉ. पी. एस. कदम यांनी परिस्थितीचे गांभीर्य ओळखून श्रवणवर तातडीने उपचार सुरू केले. रात्रभर त्याच्यावर उपचार सुरू होते. डॉक्टरांच्या प्रयत्नांमुळे पहाटेपर्यंत त्याच्या प्रकृतीत काहीशी सुधारणा झाली, मात्र विषाचा पूर्ण परिणाम अद्याप ओसरलेला नव्हता. शरीर थकलेले होते आणि मानसिक दडपणही मोठे होते. सकाळी उठल्यानंतर श्रवणने पेपरला जाण्याचा हट्ट धरला. प्रकृती पूर्णपणे स्थिर नसतानाही त्याने आपल्या जिद्दीच्या जोरावर परीक्षा केंद्रावर जाण्याचा निर्णय घेतला.

डॉक्टरांच्या देखरेखीखाली तो परीक्षा केंद्रावर पोहोचला. दोन तास इंग्रजीचा पेपर आत्मविश्वासाने सोडवल्यानंतर तो पुन्हा तातडीने रुग्णालयात दाखल झाला. सध्या श्रवणची प्रकृती स्थिर असून तो डॉक्टरांच्या निगराणीखाली उपचार घेत आहे. पण सर्पदंश होऊनही तो अशाप्रकारे पेपर देण्यासाठी परीक्षा केंद्रावर आल्याने त्याच्या हिमतीचं कौतुक केलं जात आहे.