Weather Alert: शिमग्याआधीच वारं फिरलं, महाराष्ट्रावर नवं संकट, हवामान विभागाचा महत्त्वाचा अलर्ट

महाराष्ट्राच्या हवामानात फेब्रुवारीअखेर मोठे बदल जाणवत आहेत. गेल्या 3-4 दिवसांतील अवकाळी पावसाचं संकट टळलं आहे. 28 फेब्रुवारी रोजी हवामान कोरडं आणि उष्ण राहील. कोकण, मध्य महाराष्ट्र, मराठवाडा आणि विदर्भात पावसाचा कोणताही इशारा नाही. शनिवारचं हवामान अपडेट जाणून घेऊ.

मुंबईतील हवामान उष्ण आणि दमट राहील. तापमानाचा पारा 32 अंशांच्या पार गेल्याने नागरिकांना उकाडा हैराण करेल. तर किमान तापमान 20-22 अंश सेल्सिअस दरम्यान राहील. हवामान कोरडे राहणार असून पावसाची कोणतीही शक्यता नही. हवेची गुणवत्ता खराब राहणार असल्याने संवेदनशील व्यक्तींनी बाहेर वेळ कमीच घालवावा.

पुण्यात देखील हवापालट झाल्याचे चित्र आहे. हवामान कोरडे आणि उष्ण राहणार आहे. किमान तापमान 12-14 आणि कमाल 33 अंशांवर राहील. त्यामुळे सकाळी आणि रात्री काहीसा गारवा तर दुपारी कडक ऊन अशी विचित्र हवामान स्थिती राहील. त्यामुळे पुणेकरांनी योग्य ती काळजी घ्यावी.

उत्तर महाराष्ट्रातील नाशिकमध्ये देखील हवामान उष्ण आणि कोरडे राहील. कमाल तापमान 32-34 अंश आणि किमान तापमान 16-19 अंश सेल्सिअस राहील. शनिवारी उत्तर महाराष्ट्रात पावसाचा कोणताही अलर्ट नाही. मात्र, काही ठिकाणी हीटवेव्हचा अलर्ट देण्यात आला आहे. दिवसा कडक ऊन तर रात्री मध्यम थंडी जाणवेल.

छ. संभाजीनगरसह मराठवाड्यातील हवामान कोरडे आणि तीव्र उष्ण राहील. शनिवारी कमाल तापमानाचा पारा 36 अंशांवर जाण्याची शक्यता आहे. तर किमान तापमान 18-20 अंश सेल्सिअस राहील. पावसाची कोणतीही शक्यता नाही. मात्र, सूर्य तापल्याने काही ठिकाणी हीटवेव्ह सदृश्य स्थिती निर्माण होण्याची शक्यता आहे. त्यामुळे नागरिकांनी योग्य ती काळजी घ्यावी.

विदर्भातील अवकाळी पावसाचं संकट टळलं असून हवामानात मोठे बदल जाणवत आहेत. नागपूरसह काही जिल्ह्यांत उष्णतेचा पारा 36 अंशांपर्यंत चढण्याची शक्यता आहे. तर किमान तापमान 18-20 अंश सेल्सिअस राहील. पावसाचा कोणताही अलर्ट नाही. मात्र, काही ठिकाणी उष्णतेमुळं हीट वेव्ह सारखी स्थिती निर्माण होऊ शकते.

दरम्यान, शनिवारी राज्यात पावसाची शक्यता नाही. परंतु, विदर्भ आणि मराठवाडा भागात उष्ण लहरींचा धोका आहे. पुढील आठवडाभरात तापमानात 2-3 अंशांची वाढ होण्याची शक्यता आहे. तर सध्याचे तापमान देखील नियमित तापमानापेक्षा 2-4 अंशांनी जास्त आहे. त्यामुळे नागरिकांनी आरोग्याची योग्य ती काळजी घ्यावी.