चॅटिंग थांबलं, कामं अडकली! व्हॉट्सॲप डाउन; युजर्सना लॉगइनमध्ये मोठी अडचण!

आठवड्याचा शेवटचा दिवस म्हणजेच शुक्रवारी सकाळीच जगभरातील लाखो व्हॉट्सअ‍ॅप युजर्सना मोठा फटका बसला आहे. WhatsApp Web अचानक ठप्प झाल्यामुळे युजर्सना आपल्या कॉम्प्युटर किंवा लॅपटॉपवर व्हॉट्सअ‍ॅप वापरता येत नाहीये. विशेषतः ऑफिसच्या कामासाठी डेस्कटॉप व्हर्जनवर अवलंबून असलेल्या नोकरदारांची यामुळे चांगलीच तारांबळ उडाली आहे.

सकाळी ९ वाजेच्या सुमारास व्हॉट्सअ‍ॅप वेबमध्ये तांत्रिक बिघाड झाल्याच्या तक्रारी वाढल्या. युजर्स क्यूआर कोड स्कॅन करून डिव्हाइस लिंक करण्याचा प्रयत्न करत आहेत, पण लॉगिन होत नाहीये.ज्यांचे व्हॉट्सअ‍ॅप आधीच लॉगिन आहे, त्यांच्या जुन्या चॅट्स लोड होत नाहीयेत. तसेच मेसेज येण्या-जाण्यासाठी प्रचंड उशीर होत आहे.

व्हॉट्सअ‍ॅपमध्ये बिघाड होताच युजर्सनी आपला मोर्चा ट्विटरकडे वळवला आहे. तिथे #WhatsAppDown हा हॅशटैग ट्रेंड होत आहे. अनेक युजर्सनी कनेक्टिंग मोडवर अडकलेल्या व्हॉट्सअ‍ॅपचे स्क्रीनशॉट शेअर करत आपली नाराजी व्यक्त केली आहे. "गेल्या एक तासापासून मी लॉगिनचा प्रयत्न करतोय, पण काहीच प्रतिसाद मिळत नाहीये," अशी पोस्ट एका त्रस्त युजरने केली आहे.

आउटेज ट्रॅक करणाऱ्या 'Downdetector' या वेबसाइटनुसार, सकाळी ८:५४ पासूनच तक्रारींची नोंद सुरू झाली होती. ९ वाजल्यानंतर या तक्रारींचा आकडा झपाट्याने वाढला. भारतसह जगातील अनेक देशांमधील सर्व्हरमध्ये ही समस्या दिसून येत आहे. दरम्यान, व्हॉट्सअ‍ॅपकडून अद्याप या तांत्रिक बिघाडावर अधिकृत स्पष्टीकरण आलेले नाही.