Afghanistan vs Pakistan war Live: युद्धाची घोषणा, काबूल कंधारवर हवाई हल्ले

पाकिस्तान आणि अफगाणिस्तान यांच्या संघर्ष सुरू झाला आहे. पाकिस्तानने ओपन वॉरची घोषणा केली. सीमेवरील तणाव आणि दहशतवादी कारवायांच्या मुद्द्यावरून पाकिस्तान आणि अफगाणिस्तानमधील संघर्ष आता टोकाला पोहोचला आहे. काबूलमधील स्फोटांच्या घटनेनंतर काही तासांतच पाकिस्तानने अफगाणिस्तानमधील अनेक शहरांमध्ये थेट हवाई हल्ले करत तालिबान सरकारला मोठा दणका दिला आहे. या हल्ल्यांमध्ये तालिबानचे अनेक लष्करी तळ आणि मुख्यालये उद्ध्वस्त झाल्याचा दावा पाकिस्तानने केला.

पाकिस्तानी माहिती मंत्र्यांनी दिलेल्या माहितीनुसार, पाकिस्तानी वायूसेनेच्या विमानांनी अफगाणिस्तानमधील काबूल, कंधार आणि पक्तिया या प्रमुख प्रांतांना लक्ष्य केले. पाकिस्तानच्या 'पीटीव्ही न्यूज' या राज्य प्रसारकाने दिलेल्या वृत्तानुसार, या हल्ल्यांची तीव्रता प्रचंड होती. हवाई हल्ल्यानंतर पाकिस्तानचे अध्यक्ष आसिफ अली झरदारी यांनी अत्यंत आक्रमक भूमिका घेतली. आमचे सैन्य कोणत्याही आव्हानाला चोख प्रत्युत्तर देण्यास सज्ज आहे. जे लोक आमच्या संयमाला आमचा कमकुवतपणा समजतात, त्यांना कडक शब्दांत उत्तर दिले जाईल आणि कोणालाही सोडले जाणार नाही, असा कडक इशारा झरदारी यांनी दिला आहे.