या हल्ल्यात महेश गायकवाड गंभीर जखमी झाले होते, त्यांच्या पाठीला आणि पोटाला गोळ्या लागल्या होत्या. उपचारानंतर आता ते पूर्णपणे बरे झाले आहेत. मात्र या गोळीबार प्रकरणी तीन आरोपी अद्याप फरार आहेत. पोलिसांनी त्यांना अटक केली नाही. याच पार्श्वभूमीवर महेश गायकवाड यांनी माजी आमदार गणपत गायकवाड आणि विद्यमान आमदार सुलभा गायकवाड यांचे पुत्र वैभव गायकवाड आणि इतर दोन आरोपींचा पत्ता सांगणाऱ्यांना २५ हजार रुपये देण्याची घोषणा केली आहे.
advertisement
याबाबत एक पोस्टरही महेश गायकवाड यांनी रिलीज केलं आहे. यात पोस्टरमधून त्यांनी वैभव गायकवाड आणि त्यांच्या दोन साथीदारांची माहिती देणाऱ्याला २५ हजार रुपये दिले जातील, अशी घोषणा केली आहे. एका विद्यमान आमदाराच्या फरार मुलाला पकडण्यासाठी चक्क शिंदे गटाच्या माजी नेत्याने अशाप्रकारे बक्षीस जाहीर केल्यानं कल्याणमधील राजकीय वातावरण तापण्याची शक्यता आहे. महेश गायकवाड हे उपमुख्यमंत्री एकनाथ शिंदे यांचे पुत्र श्रीकांत शिंदे यांचे निकटवर्तीय देखील मानले जातत. त्यामुळे कल्याणमध्ये पुन्हा एकदा भाजप विरुद्ध शिंदे गट वादाला सुरुवात होऊ शकते.
११ महिन्यांपूर्वी हिललाइन पोलीस ठाण्यात गोळीबार झाल्यानंतर तत्कालीन आमदार गणपत गायकवाड याच्यासह एकूण पाच जणांना पोलिसांनी अटक केली होती. आता यातील तीन आरोपींची जामिनावर सुटका झाली आहे. मात्र गणपत गायकवाड यांचे पुत्र वैभव गायकवाड आणि इतर दोन साथीदार अद्याप फरार आहे. आरोपी भाजपशी संबंधित असल्याने त्याच्यावर कारवाई केली जात नसल्याचा आरोपही महेश गायकवाड यांनी केला आहे. पोलिसांना आरोपी सापडत नसल्याने स्वत: महेश गायकवाड यांनीच बक्षीस जाहीर केल्याने कल्याणमधील वातारण तापताना दिसत आहे.