एक महिला दोन तरुण, 24 तासात तिघांचा खून, सांगलीत नक्की काय घडतंय?

सोमवारी ३० मार्च रोजी सांगली जिल्ह्यात एकूण तीन खुनाच्या घटना समोर आल्या. जत तालुक्यात दोन, तर सांगलीच्या संजयनगर परिसरात एक अशा तीन घटना घडल्या आहेत. तर सांगलीतील तरुणावर धारदार कोयत्याने वार करून पलायन करत असलेल्या तरुणाला एका पोलीस कर्मचाऱ्याने पाठलाग करून पकडलं. मात्र इतर दोन प्रकरणातील आरोपी अद्याप निष्पन्न झाले नाहीत.

advertisement

जतमध्ये अॅसिड हल्ला करून महिलेची हत्या

सांगली जिल्ह्याच्या जत तालुक्यातील वळसंग रस्त्यावरील नायरा पेट्रोल पंपाजवळ एका अनोळखी महिलेचा मृतदेह सोमवारी सकाळी आढळून आला. पोलिसांना माहिती मिळताच पोलिसांनी घटनास्थळी धाव घेत पाहणी केली असता, मृत महिलेवर अॅसिड हल्ला झाल्याचं दिसून आलं. अॅसिडने गंभीर भाजल्याने ३५ वर्षांच्या अनोळखी महिलेचा मृत्यू झाला असल्याचा अंदाज आहे. महिलेची हत्या कुणी केली? हे अद्याप समोर आलं नाही.

जमीनीच्या वादातून तरुणाला भोसकलं

दुसऱ्या घटनेत जत तालुक्यातील बिळूर इथं श्रीधर यळगोड नावाच्या तरुणावर अज्ञातांनी धारदार हत्याराने वार केले. यात त्यांचा जागीच मृत्यू झाला. हा प्रकार जमीन वादातून घडला असावा, अशी शक्यता वर्तवली जात आहे. या प्रकरणी पोलिसांनी गुन्हा दाखल केला असून हल्लेखोरांचा शोध घेतला जात आहे.

सपासप वार करून पळणाऱ्या आरोपीला अटक

तिसऱ्या घटनेत सोमवारी सायंकाळी सहाच्या सुमारास संजयनगर परिसरातील मंगळवार बाजार येथे सौरभ पवार नावाच्या तरुणावर जीवघेणा हल्ला झाला. त्याच्यावर धारदार हत्यारानं हल्ला करण्यात आला. हल्ल्यानंतर आरोपी घटनास्थळावरून पळून जात होता. मात्र पोलीस कर्मचारी प्रदीप भोसले यांनी पाठलाग करून या संशयित तरुणाला हत्यारासह पकडलं. एकाच दिवशी अशाप्रकारे तीन हत्येच्या घटना उघडकीस आल्याने संपूर्ण जिल्ह्यात खळबळ उडाली आहे.