देवाभाऊ, दादा सभेत बिझी, पण ठाकरे बंधू अन् सुप्रिया सुळे पडेल मागे; कार्यकर्ते हवालदील

"स्थानिक स्तरावरच्या निवडणुकीत फार लक्ष देण्याची गरज नाही" असं वक्तव्य आहे उद्धव ठाकरे यांचं. पण,

राज्यात सुरू असलेल्या स्थानिक स्वराज्य संस्थांच्या निवडणुका या मिनी विधानसभा समजल्या जातात. कार्यकर्त्यांना प्रतिनिधित्व देणाऱ्या या निवडणुकीकडे शिवसेना उद्धव ठाकरे गट, राष्ट्रवादी शरद पवार आणि मनसेच्या प्रमुख नेत्यांनी पूर्ण पाठ फिरवली आहे. तर दुसरीकडे राज्याचे मुख्यमंत्री देवेंद्र फडणवीस,  उपमुख्यमंत्री एकनाथ शिंदे आणि अजित पवार हे पायाला भिंगरी लाऊन फिरत आहेत. कार्यकर्त्यांना ताकद देत आहेत. पण, महाविकास आघाडीमध्ये मात्र चित्र उलटं आहे,  या तिन्ही पक्षांचे कार्यकर्ते हवालदिल झाले आहेत. ना उद्धव ठाकरे ना, राज ठाकरे बाहेर पडलेत, ना सुप्रिया सुळे कार्यकर्त्यांच्या मागे ठाम उभे राहिल्यात.

advertisement

नेत्यांच्या या भूमिकेमुळे या कार्यकर्त्यांनी केवळ मोठ्या नेत्यांच्या निवडणुकांमध्येच ओझी वाहायची का? निवडणुकीला लागणारी रसद विरोधी पक्षांकडून जोरदार पुरवली जातेय, तर आम्ही मात्र कुठल्याही मदतीशिवाय  एकाकी निवडणुका लढवत असल्याची खंत कार्यकर्ते व्यक्त करताहेत.

एकीकडे देवेंद्र फडणवीस, अजित पवार आणि एकनाथ शिंदे यांचे सभा उरकण्यासाठीचे धावपळीचे व्हिडीओ समोर येत आहेत तर दुसरीकडे या तिन्ही पक्षांचे अगदी आदित्य ठाकरे, अमित ठाकरे , सुप्रिया सुळे हे नेते या निवडणुकीत फार रस घेत असल्याचं दिसत नाहीय.

कुणी घेतल्या किती सभा? 

देवेंद्र फडणवीस यांनी आतापर्यंत घेतलेल्या सभा : 25

एकनाथ शिंदेंनी घेतलेल्या सभा : 39

अजित पवार यांनी घेतलेल्या सभा: 27

उध्दव ठाकरे , राज ठाकरे , सुप्रिया सुळे यांनी घेतलेल्या सभा: शून्य

राज्यात सुरू असलेल्या स्थानिक स्वराज्य संस्थांच्या निवडणुकीत काँग्रेस वगळता शिवसेना ठाकरे गट, मनसे आणि राष्ट्रवादी शरद पवार पक्ष यांनी थेट बाय देत कार्यकर्ते वाऱ्यांवर सोडल्याचं चित्र निर्माण झालंय. रसद नसताना लढायचं कसं असा प्रश्न कार्यकर्ते विचारत आहेत. त्यांना कोण उत्तर देणार?