Gold : नशिबाचा खेळ, कचऱ्याच्या डब्यात फेकले 12 लाखांचे सोने, 3 दिवसांनी दारात पोलीस आले अन्... घटनेनं सगळ्यांनाच हादरवलं

असाच काहीसा थरार एका भारतीय कुटुंबासोबत घडला. एका साध्याशा चुकीमुळे 12 लाख रुपयांचे सोने कचऱ्यात गेले, पण त्यानंतर जे घडले ते पाहून तुमचा 'माणुसकी' आणि 'प्रामाणिकपणा'वरचा विश्वास अधिक घट्ट होईल.

ही गोष्ट आहे कामिनी कन्नन यांची, ज्या 23 वर्षे दुबईत राहिल्यानंतर 2021 मध्ये भारतात परतल्या होत्या. जानेवारी 2024 च्या अखेरीस त्या एका लग्नासाठी पुन्हा दुबईला गेल्या होत्या. सोन्याचे भाव गगनाला भिडलेले असताना कामिनी यांनी त्यांच्याकडे असलेले जुने सोने तपासून पाहण्याचे ठरवले. त्यांच्याकडे 22 कॅरेटचे 4 सोन्याचे शिक्के (प्रत्येकी 8 ग्रॅम) आणि 50 ग्रॅमचे 24 कॅरेटचे सोन्याचे बिस्किट होते. ज्या पाऊचमध्ये हे सोने ठेवले होते, ते जुने झाल्यामुळे त्यांनी ते सिक्के काढून एका नवीन पाऊचमध्ये ठेवले आणि तो पाऊच डायनिंग टेबलवर ठेवला.

advertisement

पण दुसऱ्या दिवशी टेबलवर ठेवलेला तो सोन्याचा पाऊच गायब होता. शोध घेतल्यावर धक्कादायक वास्तव समोर आले. घरातील साफसफाई करताना कामिनी यांच्या मुलाने तो पाऊच 'कचरा' समजून चुकून डस्टबिनमध्ये फेकला होता. 12 लाख रुपयांचे सोने आता शहराच्या कचरा डेपोमध्ये कुठेतरी ढिगाऱ्यात गेले होते. कामिनी यांनी पुन्हा सोने मिळेल ही आशा सोडून दिली होती, तरीही त्यांनी बिल्डिंगच्या सुरक्षा रक्षकाला याची कल्पना देऊन ठेवली.

विशेष म्हणजे इतके मोठे नुकसान होऊनही या कुटुंबाने पोलिसांत तक्रार केली नव्हती, कारण त्यांना वाटले की कचऱ्यात गेलेले सोने आता कधीच मिळणार नाही. पण 4 फेब्रुवारी रोजी अचानक कामिनी यांचा मुलगा अभिमन्यू याला बिल्डिंगच्या गार्डचा फोन आला. गार्डने सांगितले की, "तुमच्या हरवलेल्या सामानाबद्दल चौकशी करण्यासाठी काही लोक आले आहेत."

दुबई पोलिसांनी त्यांच्या अत्याधुनिक 'कचरा ट्रॅकिंग सिस्टीम'च्या (Waste Tracking System) मदतीने तो पाऊच शोधून काढला होता. इतकेच नाही तर तांत्रिक तपासाद्वारे या सोन्याचा खरा मालक कोण आहे, याचाही शोध घेतला. नाईफ पोलीस स्टेशनमध्ये आवश्यक कागदपत्रे दाखवल्यानंतर, 12 लाखांचे ते सोने कामिनी यांच्या कुटुंबाला सुखरूप परत करण्यात आले.

ही केवळ सोन्याची गोष्ट नाही, तर ती प्रामाणिकपणा आणि तंत्रज्ञानाच्या अचूक वापराची कथा आहे. दुबई पोलिसांच्या मदतीमुळे एका कुटुंबाची आयुष्यभराची पुंजी वाचली. ही घटना आपल्याला शिकवते की, संकट कितीही मोठे असले तरी आशा सोडू नका आणि प्रामाणिक यंत्रणा आजही अस्तित्वात आहेत.