TRENDING:
युद्धाचा भडका आणि बाजारावर दबाव
आखाती देशामध्ये सुरू असलेला संघर्ष आता तीव्र होऊ लागला आहे. इस्रायलने इराणच्या तेल प्रकल्पांवर हल्ला केल्यानंतर, इराणने प्रत्युत्तर म्हणून कतारमधील मोठ्या ऑईल रिफायनरीवर क्षेपणास्त्र डागले आहेत. या हल्ल्यामुळे कच्च्या तेलाच्या (Crude Oil) किमती ११३ डॉलर प्रति बॅरलवर पोहोचल्या आहेत. सहसा युद्धकाळात सोन्याचे दर वाढतात, मात्र यावेळी चित्र उलटे दिसत आहे. गुंतवणूकदार सध्या 'कॅश' कडे वळत असल्याने सोन्या-चांदीत मोठी विक्री पाहायला मिळत आहे.
advertisement
अमेरिकन फेडच्या निर्णयाचा परिणाम...
सोन्या-चांदीच्या घसरणीमागे अमेरिकन फेडरल रिझर्व्हचा निर्णय सर्वात महत्त्वाचा ठरला आहे. फेडने व्याजदर स्थिर ठेवले असून भविष्यात दर कपातीची शक्यता फेटाळून लावली आहे. फेडरल रिझर्व्हचे चेअरमन जेरोम पॉवेल यांनी जागतिक तणावामुळे आर्थिक स्थिती चिंताजनक असल्याचे संकेत दिले, ज्यामुळे जागतिक बाजारपेठेत मौल्यवान धातूंची जोरदार विक्री झाली.
चांदीच्या दरात १.८५ लाखांची घसरण, सोन्याचा दरही घसरला...
२९ जानेवारी २०२६ रोजी चांदीने ४.२० लाख रुपये प्रति किलोचा विक्रमी उच्चांक गाठला होता. मात्र, त्यानंतर अवघ्या काही दिवसांत चांदी १.८५ लाख रुपयांनी स्वस्त झाली असून सध्या ती २.३५ लाख रुपयांच्या आसपास व्यवहार करत आहे. दुसरीकडे, सोन्याचा दरही १.५० लाख रुपयांच्या खाली घसरला आहे. नफावसुली आणि जागतिक बँकांचे कडक धोरण यामुळे ही घसरण आणखी काही काळ सुरू राहण्याची भीती तज्ज्ञांनी व्यक्त केली आहे.