पुण्यातील या तरुणाचे नाव विक्रम मोटे आहे. त्याने आयटीमधील नोकरी सोडून पारंपरिक खाद्यसंस्कृतीला चालना देण्याचा निर्णय घेतला आणि चपातीघर डॉट कॉम या नावाने पुण्यातील तळजाई टेकडी भागात भाकरी-चपातीचा व्यवसाय सुरू केला. त्याच्या भाकरी-चपातीला मोठ्या प्रमाणात मागणी आहे.
advertisement
कोरोना काळानंतर नोकरी सोडत हा व्यवसाय सुरू केला. सुरुवातीला दिवसाला फक्त 250 चपात्यांपासून सुरुवात झाली होती. परंतु सध्याच्या घडीला तो दिवसाला 2500 ते 3000 चपात्या आणि भाकऱ्या विकतो. प्रामुख्याने गव्हाच्या चपात्या तसेच तांदूळ, ज्वारी आणि बाजरीच्या भाकरी या बनवल्या जातात. कॅन्टीन, मेस, हॉटेल्स आणि रेस्टॉरंट्सना यांना या सप्लाय केल्या जातात.
या व्यवसायातून सध्या 15 ते 20 महिलांना रोजगार मिळाला आहे आणि दर महिन्याला सुमारे 50 ते 60 हजार रुपयांचा निव्वळ नफा मिळतो. गुणवत्ता आणि सातत्य यामुळे ग्राहकांचा उत्तम प्रतिसाद मिळत असल्याचे विक्रम सांगतो. त्याच्या या प्रवासात मित्र सुधीर उदार हेही सहभागी असून दोघांनी मिळून चपातीघर डॉट कॉमला यशाच्या दिशेने नेले आहे.
विक्रम मोटे यांचा हा प्रवास इतर तरुणांसाठी एक प्रेरणास्त्रोत ठरत आहे. पारंपरिक खाद्यसंस्कृतीला आधुनिक व्यावसायिक रूप देत त्याने एक वेगळी ओळख निर्माण केली आहे. हे यश धाडस, चिकाटी आणि सकारात्मक दृष्टिकोनाचे उत्तम उदाहरण आहे.