TRENDING:माढा तालुक्यातील संदीप कापसे यांचे शिक्षण मेकॅनिकल इंजिनिअरिंगपर्यंत झाले आहे. शिक्षण पूर्ण झाल्यानंतर त्यांनी काही वर्षे पुणे येथे खाजगी नोकरी केली. मात्र वाढती महागाई आणि नोकरीतून मिळणाऱ्या पगारातून कोणतीही बचत होत नसल्याने त्यांनी नोकरी सोडून स्वतःचा व्यवसाय सुरू करण्याचा निर्णय घेतला.
पुणे येथून सोलापुरात परतल्यानंतर संदीप यांनी रहस्य या नावाने व्यवसायाला सुरुवात केली. सुरुवातीला त्यांनी लाकडी घाण्याच्या माध्यमातून शेंगदाणा तेल आणि करडई तेल तयार करून विक्री करण्यास सुरुवात केली. व्यवसाय नवीन असल्यामुळे सुरुवातीच्या काळात विक्री करताना अनेक अडचणींचा सामना करावा लागला. मात्र सातत्य, ग्राहकांचा विश्वास आणि योग्य मार्केटिंगच्या जोरावर त्यांनी व्यवसायात हळूहळू प्रगती साधली.
advertisement
आज संदीप कापसे यांनी रहस्य या नावाला एक ब्रँड म्हणून ओळख मिळवून दिली आहे. लाकडी घाण्यापासून तेल तयार करण्याबरोबरच गूळ पावडर, गूळकळी, गुलकंद, सेंद्रिय हळद तसेच आवळ्यापासून विविध उत्पादने तयार करण्याचे काम ते करत आहेत. त्यांच्या या व्यवसायातून सध्या महिन्याला सुमारे 3 ते 4 लाख रुपयांची उलाढाल होत आहे.
तरुणांनी केवळ नोकरीच्या मागे न लागता स्वतःची स्वप्ने पूर्ण करण्यासाठी व्यवसायाकडे वळावे, असा सल्ला संदीप कापसे यांनी दिला आहे. सुरुवातीला काही अडचणी येतात, मात्र चिकाटी आणि मेहनतीच्या जोरावर यश नक्की मिळते, असा विश्वास त्यांनी व्यक्त केला.