रात्री ढाब्यासमोरील ट्रकखाली झोपला तरुण; पहाटे डोळे उघडण्याआधीच मृत्यूनं गाठलं; पुण्यात अंगावर काटा आणणारी घटना

मिळालेल्या माहितीनुसार, सरदवाडी येथील 'राजस्थान ढाब्या'च्या पार्किंगमध्ये हा प्रकार घडला. २३ फेब्रुवारी रोजी पहाटेच्या सुमारास ट्रक (क्रमांक TN 88 M 1864) चा चालक बालसुब्रह्मण्यम मुर्गेशन (रा. तामिळनाडू) याने आपला ट्रक पुढे नेण्यासाठी सुरू केला. मात्र, रात्रीच्या वेळी ट्रकखाली योगेश साठे झोपलेले असल्याचे त्याच्या लक्षात आले नाही. निष्काळजीपणे ट्रक पुढे घेतल्याने मागील चाक योगेश यांच्या कंबरेवरून गेले. यात त्यांना गंभीर दुखापत होऊन त्यांचा मृत्यू झाला.

हृदयद्रावक बाब म्हणजे, अपघात झाल्याचे लक्षात येऊनही चालकाने जखमीला मदत करण्याऐवजी किंवा पोलिसांना कळवण्याऐवजी घटनास्थळावरून पोबारा केला. पोलिसांनी दिलेल्या माहितीनुसार, चालकाने अत्यंत बेजबाबदारपणे वाहन चालवल्याने एका निष्पाप तरुणाचा जीव गेला आहे. या प्रकरणी शिरूर पोलीस ठाण्यात चालक मुर्गेशन याच्या विरोधात गुन्हा दाखल करण्यात आला आहे.