शेअर मार्केटमध्ये सर्वात मोठा भूकंप, काही तासांत बुडाले 1,00,372 कोटी, IT सेक्टरला मोठा फटका

बाजारात व्यवहार सुरू होताच आयटी शेअर्समध्ये विक्रीचा सपाटा पाहायला मिळाला आहे. इन्फोसिस ५.१८ टक्क्यांनी घसरून १३९६ रुपयांवर आले. TCS ४.५८ टक्क्यांनी तुटून २७७६ रुपयांपर्यंत खाली आले. टेक महिंद्रा ४.८४ टक्क्यांची मोठी घसरण होऊन १५५५ रुपयांवर पोहोचले.

कोणत्या सेक्टरला सर्वात जास्त फटका?

विप्रो आणि HCL टेक या शेअर्समध्येही ४ टक्क्यांपर्यंत पडझड झाली. या पाच मोठ्या कंपन्यांचे एकूण मार्केट कॅप बुधवारी २४.७१ लाख कोटी रुपये होते, जे गुरुवारी एकाच दिवसात २३.७१ लाख कोटी रुपयांवर आले. आयटी क्षेत्रातील या पडझडीमागे अमेरिकन बाजारातील हालचाली आणि कृत्रिम बुद्धिमत्तेचा (AI) वाढता प्रभाव कारणीभूत असल्याचे मानले जात आहे. अमेरिकन मार्केटमधील परिणाम: अमेरिकेत इन्फोसिस आणि विप्रोच्या एडीआरमध्ये ५ टक्क्यांपर्यंत घट झाली, ज्याचे थेट पडसाद भारतीय बाजारात उमटले. एंथ्रोपिक सारख्या कंपन्यांनी नवीन क्लाउड कोवर्क प्लगइन्स लाँच केल्याने गुंतवणूकदारांमध्ये भीती पसरली आहे.

advertisement

एआयमुळे भारतीय आयटी कंपन्यांचा पारंपरिक बिझनेस मॉडेल धोक्यात येऊ शकतो, अशी शक्यता वर्तवण्यात येत आहे. पॅलेंटि सारख्या कंपन्यांनी असा दावा केला आहे की, जे स्थलांतर करण्यासाठी पूर्वी अनेक वर्षे लागायची, ते आता केवळ काही आठवड्यांत शक्य आहे. यामुळे मजुरी आणि वेळेची बचत होत असली तरी, पारंपरिक आयटी कंपन्यांच्या उत्पन्नावर त्याचा गदा येणार आहे. एकेकाळी मार्केट कॅपमध्ये दुसऱ्या क्रमांकावर असणारी TCS आता थेट पाचव्या क्रमांकावर घसरली आहे.

तज्ज्ञांचे मत

गुरुवारी झालेल्या पडझडीनंतर टीसीएसचे मार्केट कॅप १०.०३ लाख कोटी रुपयांवर आले आहे. विशेष म्हणजे, स्टेट बँक ऑफ इंडिया ११ लाख कोटींच्या पार गेल्याने ती दुसऱ्या स्थानी पोहोचली आहे, तर ICICI बँक १०.१६ लाख कोटींसह टीसीएसच्या पुढे गेली आहे. जिओजित इन्व्हेस्टमेंट्सचे रणनीतीकार व्ही. के. विजयकुमार यांच्या मते, अमेरिकन बाजारातील अस्थिरता पाहता भारतीय आयटी क्षेत्राला आगामी काळात मोठ्या संघर्षाचा सामना करावा लागू शकतो.

गुंतवणूकदार आता आयटीमधून पैसा काढून बँकिंग आणि इतर चांगल्या कामगिरी करणाऱ्या क्षेत्रांकडे वळण्याची शक्यता आहे. एका दिवसात १ लाख कोटी गायब: ५ मोठ्या आयटी कंपन्यांचे मार्केट कॅप लक्षणीयरीत्या घटले. एसबीआय आणि आयसीआयसीआय बँकेने टीसीएसला मार्केट कॅपमध्ये मागे टाकले. नवीन सॉफ्टवेअरमुळे आयटी कंपन्यांच्या कामावर परिणाम होण्याची भीती.