240500000000 तुम्ही फक्त आकडे मोजा! Gold ETF ने स्टॉकमध्ये पैसे लावणाऱ्यांना फोडला घाम

एकेकाळी शेअर बाजारातील म्युच्युअल फंडच्या मागे धावणारा भारतीय गुंतवणूकदार आता सोन्या-चांदीकडे आकर्षित झाला. जानेवारी महिन्यात सोन्या-चांदीच्या ईटीएफमध्ये गुंतवणूक पहिल्यांदाच इक्विटी म्युच्युअल फंडांच्या तुलनेत अधिक झाली आहे. जागतिक अस्थिरता आणि सुरक्षित गुंतवणुकीची ओढ यामुळे सोन्याने इक्विटीला मागे सोडलं आहे. इतकंच नाही शेअर मार्केट आणि इक्विटी म्युच्युअल फंडच्या तुलनेत इथे लोकांची जास्त पसंती आणि रिटर्न मिळण्याच्या उद्देशानं पैसे गुंतवत आहेत.

advertisement

आकडेवारी काय सांगते?

मनी कंट्रोलने दिलेल्या वृत्तानुसार, जानेवारी महिन्यात गोल्ड आणि सिल्वर ईटीएफमध्ये एकूण ३३,५०३ कोटी रुपयांची विक्रमी गुंतवणूक झाली. याउलट, इक्विटी म्युच्युअल फंडांमध्ये केवळ २४,०१३ कोटी रुपयांची गुंतवणूक झाली आहे. एकट्या सोन्यात २४,०५० कोटींची गुंतवणूक झाली, जी डिसेंबरच्या तुलनेत दुपटीहून अधिक आहे. चांदीमध्येही ९,४६३ कोटी रुपयांचा मोठा ओघ आला आहे.

शेअर बाजारात सुस्ती; लार्ज-कॅपमध्ये वाढ, पण स्मॉल-कॅप घटले

शेअर बाजारातील अस्थिरतेमुळे गुंतवणूकदार सावध झाले आहेत. डिसेंबरच्या तुलनेत इक्विटी फंडांमधील गुंतवणूक १४ टक्क्यांनी घटली आहे. विशेषतः मिड-कॅप आणि स्मॉल-कॅप फंडांमधील ओघ कमी झाला असून, गुंतवणूकदारांनी सुरक्षित समजल्या जाणाऱ्या लार्ज-कॅप फंडांना पसंती दिली आहे. मात्र, एसआयपीमधील गुंतवणूक ३१,००२ कोटींवर स्थिर राहिल्याने सामान्य गुंतवणूकदारांचा बाजारावरचा विश्वास अजूनही टिकून असल्याचे दिसते.

तज्ज्ञांचं म्हणणं काय, थांबावं की पैसे गुंतवावे?

वर्ल्ड गोल्ड काउंसिलच्या मते, जानेवारीत झालेली गुंतवणूक ही देशातील सोन्याच्या एकूण मालमत्तेच्या (AUM) १२.५% आहे. 'चॉइस एएमसी'चे रोचन पटनायक यांच्या मते, बाजारातील चढ-उतार आणि Geo-political Risk पासून वाचण्यासाठी सोनं हे उत्तम साधन आहे. जेव्हा सोन्याच्या किमतीत थोडी घट झाली, तेव्हा गुंतवणूकदारांनी ती खरेदीची संधी मानली. ग्रो म्युच्युअल फंड'चे सीईओ वरुण गुप्ता म्हणतात की, सोने आणि चांदी आता केवळ दागिने राहिले नसून ते मुख्य प्रवाहातील आर्थिक गुंतवणूक म्हणून स्वीकारले जात आहेत. तज्ज्ञांच्या मते, तुमच्या एकूण गुंतवणुकीच्या १० ते १५ टक्के हिस्सा सोने किंवा चांदीमध्ये गुंतवू शकता.

डिस्क्लेमर: या बातमीमध्ये दिलेली माहिती केवळ शैक्षणिक आणि माहितीच्या उद्देशाने आहे. हे कोणत्याही प्रकारचे गुंतवणूक सल्ले नाहीत. शेअर बाजारातील गुंतवणूक जोखमीच्या अधीन असते. कोणताही व्यवहार करण्यापूर्वी तुमच्या आर्थिक सल्लागाराचा सल्ला नक्की घ्या. कोणत्याही आर्थिक फायद्यासाठी किंवा नुकसानीसाठी न्यूज 18 मराठी जबाबदार राहणार नाही.