TRENDING:
उच्च शिक्षित दांपत्याला हुशारी पडली महागात!
गेल्या काही वर्षात एआयचा वापर वाढलेला आहे. मात्र याच तंत्रज्ञानाचा वापर करुन दाम्पत्यातील पतीने आर्टिफिशियल इंटेलिजन्सच्या मदतीने बनावट डिजिटल पास तयार केल्याची धक्कादायक माहिती पुढे आली आहे. हा पास त्यांनी कल्याण-सीएसएमटी एसी लोकलमधून प्रवास करण्यासाठी केला होता. टीसीच्या जागरूकतेमुळे संपूर्ण प्रकरण समोर आले आणि शेवटी या दोघांना थेट तुरुंगात धाडण्यात आले.
advertisement
काय होती ही चूक?
मिळालेल्या माहितीनुसार,बुधवार, 26 नोव्हेंबर 2025 रोजी सकाळच्या गर्दीच्या वेळेत एसी लोकलमध्ये नियमित तिकीट तपासणी सुरू होती. टीसी विशाल नवले हे प्रवाशांची तिकिटे तपासत असताना त्यांना आरोपी महिलेचा पास पाहताना संशय आला. त्यांनी दाखवलेला डिजिटल पास अधिकृत UTS ॲपवर नसून थेट गुगल क्रोम ब्राउझरवर उघडलेला होता. सर्वात महत्त्वाचे म्हणजे डिजिटल पाससाठी आवश्यक असणारा QR कोड त्यात नव्हता.
मग टीसीचा संशय वाढताच टीसीनी पासवरील क्रमांक रेल्वे हेल्पलाईनवर तपासला. या तपासणीत उघड झाले की पासाची वैधता संपलेली होती. शिवाय तो पास त्या महिलेच्या नावावर नसून त्यांच्या पतीच्या नावावर होता. यानंतर टीसीने महिला प्रवासीची चौकशी केली, ज्यात त्यांनी कबूल केले की हा पास त्यांच्या पतीनेच AI च्या मदतीने तयार करून दिला होता.
दोघांनी एकाच बनावट पासवर प्रवास करून रेल्वे प्रशासनाची फसवणूक केल्याचे स्पष्ट झाल्यावर टीसी यांनी तत्काळ कल्याण लोहमार्ग पोलिसांकडे तक्रार दिली. पोलिसांनी दोघांना अटक करून फसवणूक आणि बनावट दस्तऐवज तयार करण्याचे गुन्हे दाखल केले आहेत.