Mumbai Local Clash: लोकलमध्ये राडा, दोघांच्या भांडणात तिसऱ्याचा डोळा फुटला, ३२ तासांत आरोपी अटकेत

नेमकी घटना काय?

दादर येथे राहणारे निशांत खत्री हे ३ फेब्रुवारी २०२६ रोजी रात्री अंधेरीहून दादरला जाण्यासाठी फास्ट लोकलने प्रवास करत होते. रात्री ११ च्या सुमारास गाडी वांद्रे स्थानकाच्या फलाट क्रमांक ५ वर आली. त्याच डब्यात दोन प्रवाशांमध्ये जागेवरून जोरदार भांडण सुरू होते. गाडी स्थानकात थांबली असताना, भांडण करणाऱ्यांपैकी एक प्रवासी रागाच्या भरात खाली उतरला. त्याने रेल्वे ट्रॅकवरील मोठा दगड उचलला आणि डब्याच्या दिशेने भिरकावला.

advertisement

दुर्दैवाने, हा दगड वादात नसलेल्या निशांत खत्री यांच्या डोळ्याला अत्यंत वेगाने लागला. दगड लागताच निशांत रक्तबंबाळ झाले आणि डब्यात एकच खळबळ उडाली. त्यांना तातडीने भाभा रुग्णालयात दाखल करण्यात आले, जिथे त्यांच्यावर उपचार सुरू आहेत. त्यांच्या डोळ्याला गंभीर दुखापत झाली आहे.

पोलिसांची 'सुपरफास्ट' कारवाई...

रेल्वे पोलिसांनी निशांत खत्री यांचा जबाब नोंदवून अज्ञात व्यक्तीविरुद्ध गुन्हा दाखल केला. घटनेचे गांभीर्य ओळखून वरिष्ठ पोलीस निरीक्षक शहाजी निकम आणि उपनिरीक्षक एम.बी. बच्छाव यांच्या पथकाने वांद्रे स्थानकातील सीसीटीव्ही फुटेज पिंजून काढले. तपासात संशयित आरोपी दादर परिसरात असल्याची माहिती मिळाली. पोलिसांनी सापळा रचून त्याला ताब्यात घेतले.

योगेंद्र वंशराज (वय २६ वर्ष) असे अटक केलेल्या आरोपीचे नाव आहे. तो मूळचा उत्तर प्रदेशचा असून सध्या वसईत मजुरीचे काम करतो. पोलीस चौकशीत त्याने रागाच्या भरात दगड मारल्याची कबुली दिली आहे.