TRENDING:
खरं तर नगेंद्र कुमार यांची पत्नी ममता कुमारी या रेल्वेने बिहारला जात होत्या. पण रेल्वे प्रवासादरम्यान अचानक प्रसूती कळा सुरू झाल्या. रेल्वेमध्ये डॉक्टर किंवा वैद्यकीय सुविधा नसल्यामुळे परिस्थिती अतिशय गंभीर बनली होती.मुंबईहून पुढे जाणारी एक्सप्रेस कसारा स्थानकावर इंजिन जोडण्यासाठी थांबणार होती. त्या वेळेत कसारा पर्यंत कसेबसे पोहोचू दे, अशी प्रार्थना करत हे दांपत्य देवाकडे साकडे घालत होते. आणि देवाने त्यांच ऐकलं आणि गाडी थांबली.
advertisement
दरम्यान ट्रेन कसारा स्थानकात पोहोचताच काही सज्जन नागरिकांनी तत्परतेने पुढाकार घेतला. काळूबाई चंद्रकांत लहाने आणि सरला खंडू भानगीर यांनी तातडीने धाडस दाखवत प्रसूतीसाठी मदत केली. याच वेळी प्राथमिक आरोग्य केंद्र कासार येथील सुकला मॅडम यांनी कर्तव्यदक्ष नर्स सिस्टर सोनाली सागर सांगळे यांना या घटनेची माहिती दिली आणि तत्काळ पोहोचण्यास सांगितलं.
या घटनेची माहिती मिळताच सोनालीताई तात्काळ कसारा रेल्वे स्थानकावर दाखल झाल्या. रेल्वे स्टेशनवर कोणतेही वैद्यकीय साहित्य उपलब्ध नसताना देखील त्यांनी अत्यंत धैर्य आणि कौशल्याने प्रसूतीची पुढील प्रक्रिया पूर्ण केली. त्यांच्या अथक प्रयत्नांमुळे आई आणि बाळ दोघेही सुरक्षित राहिले.
यानंतर ॲम्ब्युलन्स चालक सतीश खरे, शोभा सोनवणे, जी.आर.पी.एफ. पोलिस शिपाई विष्णू आसाराम सुपेकर, तसेच सरपंच प्रकाश वीर यांनी तातडीने मदत करत महिलेला प्राथमिक आरोग्य केंद्र कासार येथे सुरक्षित पोहोचवून दाखल केले. सध्या महिलेची प्रकृती स्थिर असल्याची माहिती मिळाली आहे.
या संपूर्ण मोहिमेत ड्युटीवर असलेले स्टेशन मास्तर रोहितजी उबाळे आणि RPF वरिष्ठ पोलिस निरीक्षक सचिन मोरे यांनीही अत्यंत दक्षतेने आपले कर्तव्य पार पाडत माणुसकीचा धर्म जपला.कसारा रेल्वे स्थानकावर घडलेली ही घटना माणुसकीच दर्शन घडवते.