आता जुने ट्रॅक्टर विकून टाका! मार्केट गाजवणारे ३ लाखांपर्यंतचे ट्रॅक्टर खरेदी करा, फीचर्स काय आहेत?

आधुनिक शेतीमध्ये यांत्रिकीकरणाला मोठे महत्त्व प्राप्त झाले आहे. ट्रॅक्टरसारखी कृषी यंत्रे शेतकऱ्यांचा वेळ, मजुरी आणि खर्च वाचवतात, तसेच उत्पादनक्षमता वाढवण्यास मदत करतात. लहान व मध्यम शेतकऱ्यांसाठी मिनी ट्रॅक्टर हा किफायतशीर आणि उपयुक्त पर्याय ठरत आहे. बागायती शेती, भाजीपाला लागवड, फळबाग आणि अरुंद शेतजमिनीसाठी मिनी ट्रॅक्टर विशेषतः उपयुक्त मानले जातात. सुमारे ३ लाख रुपयांच्या श्रेणीत येणाऱ्या महिंद्रा युवराज 215 NXT आणि स्वराज 717 या दोन मिनी ट्रॅक्टरांची बाजारात चांगली मागणी आहे. या दोन्ही मॉडेल्सची वैशिष्ट्ये आणि किंमत जाणून घेऊया.

इंजिन आणि क्षमता तुलना - महिंद्रा युवराज 215 NXT या मिनी ट्रॅक्टरमध्ये 864 सीसी क्षमतेचे सिंगल सिलेंडर, वॉटर कूल्ड इंजिन देण्यात आले आहे. हे इंजिन 15 हॉर्सपॉवर (HP) ताकद निर्माण करते. यामध्ये सुमारे 12 HP पीटीओ (PTO) पॉवर मिळते, जी रोटाव्हेटर, स्प्रे पंप किंवा इतर उपकरणांसाठी उपयुक्त ठरते.

दुसरीकडे, स्वराज 717 ट्रॅक्टरमध्ये 863.5 सीसी क्षमतेचे सिंगल सिलेंडर, वॉटर कूल्ड इंजिन देण्यात आले असून तेही 15 HP पॉवर जनरेट करते. मात्र यामध्ये सुमारे 9 HP पीटीओ पॉवर उपलब्ध आहे. दोन्ही ट्रॅक्टरांची उचल क्षमता (लिफ्टिंग कॅपॅसिटी) सुमारे 780 किलो इतकी आहे, जी छोट्या शेती कामांसाठी पुरेशी मानली जाते.

गिअरबॉक्स आणि इतर फीचर्स महिंद्रा युवराज 215 NXT मध्ये मेकॅनिकल स्टीयरिंग (सिंगल ड्रॉप आर्म) आणि 8 फॉरवर्ड + 3 रिव्हर्स गिअरबॉक्स दिला आहे. त्यामुळे वेगवेगळ्या कामांसाठी गती नियंत्रण अधिक सुलभ होते. स्वराज 717 मध्येही मेकॅनिकल स्टीयरिंग देण्यात आले असून त्यात 6 फॉरवर्ड + 3 रिव्हर्स गिअरबॉक्स आहे. दोन्ही ट्रॅक्टरमध्ये ड्राय डिस्क ब्रेक्सची सुविधा उपलब्ध आहे, ज्यामुळे सुरक्षित ब्रेकिंग मिळते.

महिंद्रा युवराज 215 NXT हा टू-व्हील ड्राइव्ह (2WD) प्रकारात येतो. त्यामध्ये पुढील टायर 5.20 x 14 आणि मागील टायर 8.00 x 18.6 आकाराचे आहेत. स्वराज 717 देखील 2WD प्रकारात असून त्यात 5.20 x 14 पुढील आणि 8.00 x 18 मागील टायर देण्यात आले आहेत.

किंमत आणि वॉरंटी - महिंद्रा युवराज 215 NXT ट्रॅक्टरची एक्स-शोरूम किंमत सुमारे 3.20 लाख ते 3.40 लाख रुपयांच्या दरम्यान आहे. कंपनीकडून या ट्रॅक्टरवर 2 वर्षांची वॉरंटी दिली जाते. स्वराज 717 ट्रॅक्टरची एक्स-शोरूम किंमत अंदाजे 3.20 लाख ते 3.30 लाख रुपयांपर्यंत आहे. या मॉडेलवर कंपनी 1 वर्षाची वॉरंटी देते.