सततची बदली अन् नोकरीचं टेन्शन, थेट राजीनामा दिला, आता तरुणीची लाखात कमाई

आपल्या अंगच्या कला-गुणांना ओळखून व्यवसाय केल्यास नोकरीपेक्षा बक्कळ कमाई होऊ शकते. नाशिकमधील एका उच्चशिक्षित तरुणीने हेच ओळखून नोकरी सोडून स्वत:चा व्यवसाय सुरू केला आहे. आता ‘बल्लवराज व्हेज आणि नॉनव्हेट’ हॉटेलच्या माध्यमातून प्रज्ञा अनिरुद्ध या चांगली कमाई करत आहेत. तसेच त्या इतर महिलांना रोजगार देखील देत आहेत.

प्रज्ञा यांनी संगणक विषयात पदव्युत्तर (एमसीएस) शिक्षण घेतलं आणि पुण्यातील एका नामांकित कंपनीत नोकरी सुरू केली. परंतु, पतीची नोकरीच्या निमित्ताने नाशिकला बदली झाली. सततची बदली आणि नोकरीचं टेन्शन यावर स्वत:चा व्यवसाय करण्याचा निर्णय प्रज्ञा यांनी घेतला.

स्वयंपाक चांगला बनवण्यास येत असल्यानं त्यांनी स्वत:चं हॉटेल सुरू करण्याचा विचार केला. पहिल्यांदा एका फूड मॉलमध्ये स्वत:चा स्टॉल लावला. परंतु, याठिकाणी व्यवसायात मोठं नुकसान झालं, असं प्रज्ञा सांगतात.

पहिल्यांदाच फूड बिझनेसमध्ये नुकसान सहन करावं लागलं. मात्र, पतीच्या सहकार्यामुळं प्रज्ञा यांनी पुन्हा स्वत:चं हॉटेल सुरू करण्याचा निर्णय घेतला. नाशिकमध्ये इंदिरानगर परिसरात गुरु गोविंदसिंग कॉलेज समोर ‘बल्लवराज’ या नावानं व्हेज नॉनव्हेज हॉटेल सुरू केलं.

विशेष म्हणजे पहिल्यांदा सुरू केलेल्या व्यवसायातील चुका टाळून नव्या व्यवसायात त्यांनी महिला कामगारांना प्राधान्य दिलं. यातून त्यांचा नव्या हॉटेल व्यवसायात चांगलाच जम बसला. आता येथील जेवणासाठी नाशिककर खवय्यांचा चांगला प्रतिसाद मिळतो, असं प्रज्ञा यांनी सांगितलं.

[caption id="attachment_1338267" align="aligncenter" width="1200"] प्रज्ञा यांनी आपल्या हॉटेल व्यवसायात महिला कामगारांना प्राधान्य दिलं. महिलांनी बनवलेल्या डिशना खवय्यांचा चांगला प्रतिसाद मिळतोय. इथे 200 रुपयात अनलिमिटेड चिकन थाळी, 250 रुपयांत अनलिमिटेड मटण थाळी मिळते. त्यात रस्सा, चपाती, भात देखील पोटभर खाऊ शकता.</dd> <dd>[/caption]

इतकेच नाही तर बिर्याणी प्रेमींसाठी देखील यांच्याकडे नेहमी ऑफर असते. त्यामुळे ग्राहकांची कायमच गर्दी असते. नोकरीत दुसऱ्याच्या हाताखाली काम करण्यापेक्षा स्वत:चा व्यवसाय कधीही चांगला, असं प्रज्ञा सांगतात.( कुणाल दंडगव्हाळ, प्रतिनिधी)