महाबळेश्वरला फिरायला जाताय? तर ही 10 पर्यटनस्थळे पाहायला विसरू नका !

महाराष्ट्राचे मिनी काश्मीर म्हणून <a href="https://news18marathi.com/maharashtra/satara/">सातारा जिल्ह्यातील</a> महाबळेश्वरची ओळख आहे. घनदाट जंगले, उंच डोंगर, खोल दऱ्या, हिरवेगार भूप्रदेश, वाहणारे धबधबे आणि गुलाबी थंडी यामुळे पर्यटकांचा या ठिकाणाकडे ओढा असतो. महाबळेश्वरच्या परिसरात पर्यटकांना आकर्षित करणारी अनेक पर्यटन स्थळे आहेत. याबाबतच आपण जाणून घेणार आहोत.

केटस पॉईंट हे महाबळेश्वरच्या मनमोहक हिल स्टेशन मध्ये वसलेले हे एक अविस्मरणीय ठिकाण आहे. सुमारे 1290 मीटर उंचीवर वसलेले हे लोकप्रिय पर्यटन स्थळ आहे. आजूबाजूला दर्‍या, हिरवे आणि भव्य पर्वत रांगा यांचे विलोभनीय दृश्य केटस पॉईंट येथून पाहता येते.

मंकी पॉइंट हे महाबळेश्वरमधील लोकप्रिय असणारे ठिकाण असून त्याला थ्री मंकी पॉइंट्स असेही म्हणतात. ही खडकांची नैसर्गिक निर्मिती आहे, जी मागे बसलेल्या तीन माकडांसारखी दिसते. खडक समुद्रसपाटीपासून सुमारे 1 हजार 400 मीटर उंचीवर आहेत आसपासच्या टेकड्या आणि दऱ्यांचे दृश्य ही तिथे पाहिला मिळतात.

महाबळेश्वर हिल स्टेशनच्या मध्यभागी स्थित असलेले महाबळेश्वर मंदिर हे प्रसिद्ध तीर्थक्षेत्र आहे. धार्मिक आणि ऐतिहासिक महत्त्व असणारे हे मंदिर देशभरातील पर्यटकांना आकर्षित करते. मंदिराची वास्तुकला, अती गुंतागुंतीचे कोरीवकाम आणि आध्यात्मिक वातावरण यामुळे एक प्रसन्न वातावरण तयार होते. 16 व्या शतकात चंद्रराव मोरे घराण्याने हे मंदिर बांधल्याचं सांगितलं जातं.

तापोळा या ठिकाणाला 'पश्चिम महाराष्ट्रातील मिनी काश्मीर' असे म्हणून ओळखले जाते. हे महाबळेश्वर मधील निसर्गरम्य गाव आहे. शिवसागर तलावाच्या काठावर वसलेले तापोळा हे मूळ नैसर्गिक परिसर आणि शांत वातावरणासाठी प्रसिद्ध आहे. हिरवीगार जंगले, टेकड्या आणि शिवसागर तलावाच्या निळ्याशार पाण्याने वेढलेलं हे ठिकाण आहे.

महाबळेश्वर हे नेहमीच पर्यटकांच्या आकर्षणाचं केंद्र राहिलं आहे. याच परिसरात असणाऱ्या अनेक धबधब्यांपैकी लिंगमळा हा धबधबा प्रसिद्ध आहे. या ठिकाणी उंचावरून पडणारं पाणी पर्यटकांना आकर्षित करतं.

महाराष्ट्रातील जुने महाबळेश्वर येथे पंचगंगा मंदिर आहे. हे भगवान कृष्णाला समर्पित आहे आणि कृष्णा, वेण्णा, कोयना, सावित्री आणि गायत्री या पाच नद्यांच्या संगमावर वसलेले आहे. हे मंदिर सुमारे 4 हजार 500 वर्षे जुने असल्याचे मानले जाते. मूळतः तेराव्या शतकात यादव राजा सिंघनदेव याने ते बांधले होते. 17 व्या शतकात छत्रपती शिवाजी महाराजांनी नंतर त्याचे नूतनीकरण केले.

टेबल लँड हे महाबळेश्वर जवळील पाचगणी या निसर्गरम्य हिल स्टेशनमध्ये वसलेले, पर्यटकांना एक अनोखा आणि मनमोहक अनुभव देणारे आकर्षक पठार आहे. आशियातील सर्वात मोठ्या ज्वालामुखीय पठारांपैकी एक टेबल लँड विस्तीर्ण क्षेत्रामध्ये पसरलेले आहे. सुमारे 4 हजार 550 फूट उंचीवर असणाऱ्या या ठिकाणाहून आजूबाजूच्या लँडस्केपचे विहंगम दृश्य दिसते.

महाबळेश्वरपासून प्रतापगड अगदी हाकेच्या अंतरावर आहे. छत्रपती शिवरायांनी अफझलखानाचा वध याच ठिकाणी केला होता. हा किल्ला 1665 साली बांधण्यात आला होता. गडावर महादेव मंदिर, भवानी मंदिर आणि अफजलखानाची कबर आहे. एक पूर्ण दिवस प्रतापगड आणि परिसरात फिरण्यासाठी जातो.

महाबळेश्वरमध्ये फिरण्यासाठी मॅप्रो गार्डन हे सर्वोत्तम ठिकाण आहे. स्ट्रॉबेरी उत्पादन ही मॅप्रो गार्डनची खासियत आहे. तिथे मध, चॉकलेट, गुलकंद यासारखे अनेक पदार्थ तयार होतात आणि त्याचा पर्यटक आस्वाद घेऊ शकतात. याशिवाय स्ट्रॉबेरी सॅलड, स्ट्रॉबेरी आईस्क्रीम आणि स्ट्रॉबेरी शेकचाही इथं मनसोक्त आनंद लुटू शकता. दरवर्षी इथं स्ट्रॉबेरी फेस्टिव्हल साजरा करण्यात येतो.

वेण्णा लेक हे 28 एकर परिसरात पसरलेलं मानवनिर्मित तळं आहे. याची निर्मिती ही महाबळेश्वर, पाचगणी परिसरातील नागरिकांची पाण्याची गरज भागवण्यासाठी झाली होती. वेण्णा लेक चारही बाजूंनी हिरवळीनं नटलेलं आहे. या तळ्यावर मासे पकडणं, बोटिंग करणं, घोडे सफारी करणं याची मजाच काही वेगळी असते. या तळ्याकाठी सूर्यास्त पाहण्याचा आनंदही अविस्मरणीय असतो. संध्याकाळच्या वेळी या ठिकाणी जाण्याचा प्लॅन केलात, तर तिथल्या निसर्गाचा अधिक मनसोक्त आनंद लुटता येईल आणि गुलाबी थंडीचा आस्वाद देखील घेता येतो.