Vidarbha Weather: विदर्भावर अवकाळी संकट, 3 जिल्ह्यांना ऑरेंज अलर्ट, तुमच्या जिल्ह्यात काय स्थिती?

एप्रिलच्या सुरुवातीलाच राज्यावर आस्मानी संकट घोंघावत आहे. 1 एप्रिल रोजीच विदर्भासह राज्यातील काही भागात वादळी वाऱ्यासह पाऊस झाला. आज 2 एप्रिलला संपूर्ण राज्यात पावसाची शक्यता असून  8 जिल्ह्यांना ऑरेंज अलर्ट देण्यात आला आहे. तर 30 जिल्ह्यांना पावसाचा यलो अलर्ट देण्यात आला आहे.

विदर्भातही आज गारपीट आणि वादळी वाऱ्यासह पावसाचा इशारा देण्यात आला आहे. विदर्भातील काही जिल्ह्यांना यलो अलर्ट तर 3 जिल्ह्यांना ऑरेंज अलर्ट जारी करण्यात आला असून मुसळधार पावसाची शक्यता आहे.

चंद्रपूर, अमरावती, यवतमाळ या तीन जिल्ह्यांत आज विजांचा कडकडाट आणि मेघगर्जनेसह मुसळधार पावसाची शक्यता आहे. हवामान विभागाने या तीन जिल्ह्यांना ऑरेंज अलर्ट दिला आहे. तसेच या जिल्ह्यांत वादळी वाऱ्यासह गारपीट होण्याचा अंदाज देखील वर्तवण्यात आला आहे.

नागपूर, वर्धा, भंडारा, गोंदिया, गडचिरोली, अकोला, बुलढाणा, वाशिम या सर्व जिल्ह्यांना 2 एप्रिलसाठी पावसाचा यलो अलर्ट जारी करण्यात आला आहे. याठिकाणी विजांच्या कडकडाट आणि मेघगर्जनेसह पावसाची शक्यता वर्तवण्यात आली आहे आहे. त्याचबरोबर गारपीट आणि वादळी वाऱ्याची शक्यता देखील वर्तवण्यात आलीये.

विदर्भात पावसाचे वातावरण असूनही काही ठिकाणचे तापमान  39 अंश सेल्सिअस इतके आहे. त्यामुळे वातावरणात दमटपणा निर्माण होण्याची शक्यता आहे. नागपूरमधील कमाल तापमान 36 अंश सेल्सिअस तर किमान तापमान 22 अंश सेल्सिअस इतकं असू शकतं.

अमरावती, यवतमाळ, गोंदिया, बुलढाणा या जिल्ह्यातील कमाल तापमान हे 35 ते 37 अंशाच्या दरम्यान आहे. या जिल्ह्यांत सुद्धा पुढील 24 तास पावसाची शक्यता कायम आहे. अकोला आणि चंद्रपूर या दोन जिल्ह्यांतील कमाल तापमान 39 अंश सेल्सिअस इतके आहे.

विदर्भात आज गारपिटीसह पावसाची शक्यता असल्यानं नागरिकांनी सावधगिरी बाळगणे गरजेचे आहे. त्याचबरोबर आरोग्याची काळजी घेणे देखील आवश्यक आहे. पावसामुळे उन्हाळी पिकांना सुद्धा फटका बसण्याची शक्यता असून शेतकऱ्यांनी योग्य ते नियोजन करावे.