तुम्हाला आलाय का Income Tax चा मेसेज, दुर्लक्ष केलंत तर होईल मोठं नुकसान

जर तुम्हालाही आयकर विभागाकडून असा मेसेज आला असेल, तर त्वरित हे काम पूर्ण करा! आयकर विभागाने अशा सर्व भाडेकरूंना नोटिसा पाठवण्यास सुरुवात केली आहे. जर तुम्ही दरमहा50,000 रुपये किंवा त्याहून अधिक भाडे देत असाल, तर तुम्हाला आयकर विभागाकडून नोटीस येऊ शकते. विभागाने असे सर्व भाडेकरू ओळखले आहेत, ज्यांनी मालकाला भाडे देताना स्रोतावरच (TDS) कर कपात केली नाही.

आयकर विभागाने आर्थिक वर्ष 2023-2024 आणि 2024-2025 मध्ये भाडेकरूंकडून हाऊस रेंट अलाउन्स (HRA) चा दावा केला असला, तरी टीडीएस कपात न केल्याच्या प्रकरणांची चौकशी सुरू केली आहे.

ऑल इंडिया टॅक्सपेयर्स असोसिएशनचे अध्यक्ष अभिषेक मुरली यांनी सांगितले की, जर तुम्ही भाडेकरू असाल आणि दरमहा 50,000 रुपये किंवा अधिक भाडे देत असाल, तर तुम्हाला टीडीएस कपात करणे अनिवार्य आहे. ऑक्टोबर 2024 पासून हा दर २% राहील (पूर्वी ५% होता). हा कपात केलेला कर सरकारकडे जमा करणे हे भाडेकरूचे कर्तव्य आहे, आणि बाकीचे पैसे मालकाला देणे आवश्यक आहे.

ज्यांनी घरमालकाला भाडे देताना टीडीएसमध्ये कपात केली नाही, अशा करदात्यांना मूल्यांकन वर्ष २०२३-२०२४ आणि २०२४-२०२५ साठी आयकर विभागाने नोटिसा पाठवल्या आहेत. यामध्ये असे नमूद केले आहे की करदात्याने या काळात हाऊस रेंट अलाउंस (HRA) चा दावा केला आहे, त्यावर टीडीएस कापलेला नाही. जर कोणत्याही भाडेकरूने असे केले नाही, तर त्याला डिफॉल्टेड करदाता मानले जाईल. अशा परिस्थितीत, आयकर विभाग तुम्हाला व्याज, दंड किंवा पेनल्टी लावू शकतो.

जर एखाद्या भाडेकरूने टीडीएस कपात केली नाही, तर त्याला डिफॉल्ट करदाते मानले जाईल. अशा परिस्थितीत, आयकर विभाग संबंधित व्यक्तीवर व्याज, दंड किंवा अतिरिक्त कर लावू शकतो. टीडीएस किती काळ कपात केले नाही, यावर दंड ठरतो. सामान्यतः, हा दर १% ते १.५% प्रतिमहिना लागू शकतो.

जर मालकाने आपल्या कर रिटर्नमध्ये भाड्याची रक्कम दाखवली असेल आणि त्यावर कर भरला असेल, तर भाडेकरूला डिफॉल्ट करदाते मानले जाणार नाही. त्यामुळे अशा परिस्थितीत कोणताही दंड किंवा व्याज लावले जाणार नाही.

जर तुम्ही या नियमानुसार टीडीएस कपात केला नसेल, तर त्वरित अपडेटेड रिटर्न दाखल करणे हा उत्तम पर्याय आहे. वेळीच योग्य ती पावले उचलल्यास, भविष्यात मोठ्या दंडाचा सामना करावा लागणार नाही. त्यामुळे आयकर विभागाच्या नियमांचे पालन करणे अत्यंत महत्त्वाचे आहे.