शेअर मार्केटमध्ये 'ब्लॅक फ्रायडे' सेल, बाजार उघडताच होणार कॉर्पोरेट धमाका; तुमच्यासाठीचे 'टॉप पिक्स'

गुरुवारी बाजार बंद झाल्यानंतर अनेक प्रमुख कंपन्यांनी आपल्या तिमाही निकालांसह विविध महत्त्वाच्या घोषणा केल्या. यात कोल इंडिया, मुथूट फायनान्स, बायोकॉन, आयजीएल, मिश्रा धातू निगम, एचसीसी, इंजिनियर्स इंडिया, होनासा कन्झ्युमर, दीपक नायट्राइट आणि एयू स्मॉल फायनान्स बँक (AU SFB) यांचा समावेश आहे. या निकालांचा संबंधित समभागांवर परिणाम होण्याची शक्यता आहे.

कोल इंडिया: कंपनीच्या उत्पन्नात आणि निव्वळ नफ्यात वर्षभराच्या तुलनेत घट दिसून आली. मात्र हे आकडे बाजाराच्या अंदाजापेक्षा चांगले होते. EBITDA आणि मार्जिन दोन्हीही मागील वर्षाच्या आणि बाजाराच्या अपेक्षेपेक्षा कमी राहिले. कंपनीने भागधारकांसाठी प्रति शेअर 5.5 रुपयांचा लाभांश जाहीर केला आहे.

मुथूट फायनान्स: कंपनीचा निव्वळ नफा 1363 कोटी रुपयांवरून तब्बल 2656 कोटी रुपयांवर पोहोचला असून यात 94.9 टक्क्यांची वाढ झाली आहे. नेट इंटरेस्ट इन्कम 64 टक्क्यांनी वाढून 2721 कोटी रुपयांवरून 4467 कोटी रुपयांवर गेली आहे. व्याज उत्पन्नातही 58 टक्क्यांची वाढ झाली आहे. कंपनीनुसार एकत्रित कर्ज AUM आणि गोल्ड लोन AUM विक्रमी पातळीवर पोहोचले आहेत.

बायोकॉन: तिसऱ्या तिमाहीत कंपनीचा नफा 25.1 कोटी रुपयांवरून वाढून 143.8 कोटी रुपये झाला आहे. उत्पन्नात 9.2 टक्क्यांची वार्षिक वाढ झाली आहे. EBITDA 11 टक्क्यांनी वाढला असून मार्जिन 19.7 टक्क्यांवरून 20 टक्क्यांपर्यंत सुधारले आहे. मात्र हे सर्व आकडे बाजाराच्या अपेक्षेपेक्षा कमी राहिले.

इंद्रप्रस्थ गॅस लिमिटेड (IGL): तिमाही आधारावर नफा 3.8 टक्क्यांनी घटून 358 कोटी रुपये झाला. उत्पन्नात 1.1 टक्क्यांची वाढ झाली आहे. EBITDA 6.7 टक्क्यांनी वाढला आहे, तर मार्जिन 11 टक्क्यांवरून 11.6 टक्क्यांपर्यंत सुधारले आहे. कंपनीने प्रति शेअर 3.25 रुपयांचा लाभांश जाहीर केला आहे.

GAIL: कंपनीने वरिष्ठ अधिकारी दीपक गुप्ता यांची चेअरमन आणि व्यवस्थापकीय संचालक (CMD) म्हणून नियुक्ती केली आहे. ही नियुक्ती 1 मार्च 2026 पासून लागू होणार आहे.

मिश्रा धातू निगम (MIDHANI): निव्वळ नफा 8.2 टक्क्यांनी वाढून 25.5 कोटी रुपयांवरून 27.6 कोटी रुपये झाला. महसूल 15.8 टक्क्यांनी वाढून 238 कोटी रुपयांवरून 275.6 कोटी रुपये झाला. EBITDA मध्ये 4 टक्क्यांची वाढ झाली; मात्र मार्जिन 22 टक्क्यांवरून घटून 19.7 टक्के झाले.

एचसीसी (HCC): कंपनीने तिसऱ्या तिमाहीत तोट्यातून बाहेर येत 8 कोटी रुपयांचा नफा कमावला. मागील वर्षी याच तिमाहीत 38.9 कोटी रुपयांचा तोटा झाला होता. उत्पन्नात 8.1 टक्क्यांची घट झाली असली तरी खर्च 25 टक्क्यांनी घटल्याने नफा मिळवता आला. तसेच एक्सेप्शनल आयटम्समधून 37.81 कोटी रुपयांचा फायदा झाला. कंपनीला 577 कोटी रुपयांचा रेल्वे कंत्राटही मिळाले आहे.

इंजिनियर्स इंडिया: कंपनीचा निव्वळ नफा तब्बल 218 टक्क्यांनी वाढला आहे. उत्पन्नात 58.3 टक्क्यांची वाढ झाली आहे. EBITDA 97.9 कोटी रुपयांवरून 352.2 कोटी रुपयांपर्यंत झेपावला आहे. मार्जिन 12.8 टक्क्यांवरून 29.1 टक्क्यांपर्यंत वाढले आहे.

होनासा कन्झ्युमर: कंपनीचा निव्वळ नफा 93.1 टक्क्यांनी वाढून 26 कोटी रुपयांवरून 50.2 कोटी रुपये झाला. महसूल 16.2 टक्क्यांनी वाढून 517.5 कोटी रुपयांवरून 601.5 कोटी रुपये झाला. EBITDA 26 कोटी रुपयांवरून 65.4 कोटी रुपये झाला असून मार्जिन 5 टक्क्यांवरून 10.9 टक्क्यांपर्यंत सुधारले आहे.

दीपक नायट्राइट: निव्वळ नफा 1.8 टक्क्यांनी वाढून 98 कोटी रुपयांवरून 99.8 कोटी रुपये झाला. महसूल 3.8 टक्क्यांनी वाढून 1,903 कोटी रुपयांवरून 1,975 कोटी रुपये झाला. EBITDA 168.2 कोटी रुपयांवरून 211.5 कोटी रुपयांपर्यंत वाढला. मार्जिन 8.8 टक्क्यांवरून 10.7 टक्क्यांपर्यंत सुधारले आहे, जे खर्च नियंत्रण आणि कार्यक्षमतेत सुधारणा दर्शवते.

AU स्मॉल फायनान्स बँक (AU SFB): संजय अग्रवाल यांची बँकेच्या व्यवस्थापकीय संचालक आणि मुख्य कार्यकारी अधिकारी (MD & CEO) पदावर पुनर्नियुक्ती करण्यात आली आहे. ही नियुक्ती 19 एप्रिलपासून प्रभावी होणार आहे.