मर्डर कसा झाला हे अजूनही गूढ, ‘Missile कुठून आले कळलेच नाही’; हमास प्रमुखाच्या हत्येआधी गडकरींची भेट

केंद्रीय रस्ते वाहतूक मंत्री नितीन गडकरी यांनी 2024 मध्ये इराणमध्ये हमासचे राजकीय प्रमुख इस्माईल हानियेह यांची प्रत्यक्ष भेट झाल्याचा धक्कादायक अनुभव सांगितला आहे. विशेष म्हणजे ही भेट हानियेह यांच्या हत्येच्या काही तास आधीच झाली होती. या हत्येमुळे संपूर्ण प्रदेशात खळबळ उडाली होती आणि गाझामध्ये इस्रायलशी सुरू असलेल्या भीषण युद्धाच्या पार्श्वभूमीवर हमासला मोठा धक्का बसला होता.

31 जुलै 2024 रोजी इराणचे नवनिर्वाचित राष्ट्राध्यक्ष मसूद पेझेशकियान यांच्या शपथविधी कार्यक्रमानंतर इस्माईल हानियेह यांची तेहरानमध्ये हत्या करण्यात आली. ते अत्यंत सुरक्षित अशा एका हॉटेलमध्ये थांबले होते. त्या काळात इस्रायल-हमास युद्ध सुरू असल्याने हानियेह हे हमासचे आंतरराष्ट्रीय पातळीवरील प्रमुख चेहरा मानले जात होते. काही महिन्यांनंतर इस्रायलचे संरक्षण मंत्री इस्रायल कॅट्झ यांनी इस्रायलच या हत्येमागे असल्याची कबुली दिली.

बुधवारी एका पुस्तक प्रकाशन कार्यक्रमात बोलताना नितीन गडकरी यांनी सांगितले की, पंतप्रधान नरेंद्र मोदी यांच्या सांगण्यावरून ते इराणला गेले होते. भारताचे प्रतिनिधित्व करत ते मसूद पेझेशकियान यांच्या शपथविधीला उपस्थित होते. शपथविधीपूर्वी तेहरानमधील एका पंचतारांकित हॉटेलमध्ये जगभरातील अनेक देशांचे वरिष्ठ नेते आणि मान्यवर अनौपचारिकरीत्या एकत्र जमले होते.

गडकरी म्हणाले, “सर्व देशांचे राष्ट्रप्रमुख तिथे उपस्थित होते, पण एक व्यक्ती अशी होती जी राष्ट्रप्रमुख नव्हती तर ती होती हमासचे नेते इस्माईल हानियेह. माझी त्याच्याशी भेट झाली. मी त्याला राष्ट्राध्यक्ष आणि मुख्य न्यायाधीशांसोबत शपथविधी समारंभाकडे जाताना पाहिले.”

“शपथविधीनंतर मी हॉटेलमध्ये परतलो. पहाटे सुमारे चार वाजता इराणमधील भारताचे राजदूत माझ्याकडे आले आणि म्हणाले की आपल्याला तात्काळ निघावे लागेल. मी विचारले काय झाले? ते म्हणाले की हमासच्या प्रमुखाची हत्या झाली आहे. हे ऐकून मला जबरदस्त धक्का बसला. मी विचारले की हे कसे घडले, तर त्यांनी सांगितले, ‘मलाही अजून माहिती नाही’,” असे गडकरी यांनी सांगितले.

इराणी अधिकाऱ्यांनी सांगितले की, हानियेह हे इस्लामिक रिव्होल्युशनरी गार्ड कॉर्प्स (IRGC) यांच्या देखरेखीखाली असलेल्या अत्यंत सुरक्षित लष्करी संकुलात थांबले होते. या हल्ल्यात त्यांचा अंगरक्षकही ठार झाला. स्थानिक माध्यमांच्या माहितीनुसार, त्यांच्या निवासस्थानावर हवेतून आलेल्या हल्ल्याने प्रहार करण्यात आला होता. गडकरी यांनी सांगितले की, हत्येची नेमकी पद्धत अजूनही स्पष्ट नाही. “काही लोक म्हणतात की मोबाईल फोन वापरल्यामुळे त्यांचा ठावठिकाणा लागला. काही जण वेगळ्या पद्धतीचा अंदाज व्यक्त करतात,” असे ते म्हणाले.

याच कार्यक्रमात गडकरी यांनी आंतरराष्ट्रीय राजकारणात देशाची ताकद किती महत्त्वाची असते, यावरही भाष्य केले. त्यांनी इस्रायलचे उदाहरण देत सांगितले की, आकाराने लहान देश असला तरी प्रगत तंत्रज्ञान आणि मजबूत लष्करी क्षमतेमुळे इस्रायलने जागतिक स्तरावर मोठा प्रभाव निर्माण केला आहे. “देश शक्तिशाली असेल, तर त्याला सहज आव्हान देता येत नाही,” असे त्यांनी सांगितले.

द टेलिग्राफ या ब्रिटनमधील वृत्तपत्राच्या रिपोर्टनुसार, इस्रायलची गुप्तचर संस्था मोसादने इराणी सुरक्षा दलातील काही एजंट्सना हाताशी धरून हानियेह ज्या इमारतीत थांबले होते, तिथे स्फोटके बसवली होती. इमारतीत मोठी गर्दी असल्यामुळे सुरुवातीला ही योजना रद्द करण्यात आली होती.

मात्र नंतर IRGC च्या अतिथीगृहातील तीन खोल्यांमध्ये स्फोटके ठेवण्यात आली, जिथे हानियेह राहू शकत होते. सीसीटीव्ही फुटेजनुसार, हे एजंट्स काही मिनिटांतच वेगवेगळ्या खोल्यांमध्ये जाऊन बाहेर पडले. त्यानंतर हे एजंट देशाबाहेर पळून गेले, पण त्यांना मदत करणारा इराणमध्येच होता.