Weather Alert: राज्यात आता जोरदार पावसाचे दिवस, हवामान विभागाकडून 13 जिल्ह्यांना अलर्ट

दक्षिण कोकणातील जिल्ह्यांमध्ये तुरळक ठिकाणी मुसळधार पावसाची शक्यता हवामान विभागाने वर्तवली आहे. तर दक्षिण मध्य महाराष्ट्र आणि मराठवाड्यातील काही जिल्ह्यांमध्ये विजांच्या कडकडाटासह आणि वादळी वाऱ्यासह जोरदार पावसाची शक्यता आहे.

तर विदर्भातील काही जिल्ह्यांमध्येही जोरदार पावसाची शक्यता हवामान विभागाने वर्तवली आहे. पाहुयात 18 जुलै रोजी राज्यामध्ये हवामानाची स्थिती कशी असेल.

मुंबई शहर आणि उपनगरामध्ये पुढील 24 तासात हलका ते मध्यम पाऊस होण्याची शक्यता आहे. मुंबईतील आकाश सामान्यतः ढगाळ राहणार असून कमाल तापमान 32 अंश सेल्सियस तर किमान तापमान 26 अंश सेल्सियसच्या आसपास असेल. कोकणातील जिल्ह्यांमध्ये तुरळक ठिकाणी मुसळधार तर अनेक ठिकाणी जोरदार पावसाची शक्यता आहे. सिंधुदुर्ग पावसाचा यलो अलर्ट देण्यात आला आहे.

उत्तर मध्य महाराष्ट्रातील धुळे, नंदुरबार, जळगाव, नाशिक, अहिल्यानगर या जिल्ह्यांमध्ये तुरळक ठिकाणी हलका ते मध्यम पाऊस होईल.

दक्षिण मध्य महाराष्ट्रातील कोल्हापूर, सातारा, सांगली, सोलापूर या जिल्ह्यांना हवामान विभागाने पावसासाठी यलो अलर्ट जारी केला आहे. उर्वरित जिल्ह्यांमध्ये हलका ते मध्यम पाऊस होईल.

मराठवाड्यातील अनेक जिल्ह्यांना हवामान विभागाने पावसासाठी यलो अलर्ट जारी केला आहे. यामध्ये बीड, धाराशिव, लातूर, नांदेड, परभणी, हिंगोली या पाच जिल्ह्यांना हवामान विभागाने 18 जुलैसाठी यलो अलर्ट जारी केला आहे. संभाजीनगर आणि जालना जिल्ह्यामध्ये तुरळक ठिकाणी हलका ते मध्यम पाऊस होईल.

तर विदर्भातील अकोला आणि अमरावती या जिल्ह्यांमध्येही काही ठिकाणी जोरदार पावसाची शक्यता आहे. विदर्भातील उर्वरित जिल्ह्यांमध्येही काही ठिकाणी मध्यम पावसाची शक्यता आहे. यवतमाळ आणि अकोल्या यलो अलर्ट देण्यात आला आहे.