Weather Alert: पुढील 24 तास महत्त्वाचे! राज्यात या ठिकाणी मुसळधार पाऊस कोसळणार, 14 जिल्ह्यांना अलर्ट

राज्यात ऊन-पावसाचा खेळ सुरूच आहे. काही जिल्ह्यांमध्ये मुसळधार पाऊस होत आहे, तर कुठे पावसाचा टिपूसही नसल्याचे पाहायला मिळत आहे.

मराठवाडा, उत्तर महाराष्ट्र आणि पश्चिम महाराष्ट्रातील काही जिल्ह्यांमध्ये पावसाने ओढ दिली आहे. तर कोकण, घाटमाथा आणि विदर्भामध्ये जोरदार पाऊस होत असल्याचे पाहायला मिळत आहे. पाहुयात 26 जून रोजी संपूर्ण राज्यात हवामानाची स्थिती कशी असेल.

मुंबई शहर आणि उपनगरात सामान्यतः ढगाळ आकाश राहील. तर काही ठिकाणी हलका ते मध्यम पावसाची शक्यता आहे. तुरळक ठिकाणी मुसळधार पाऊस देखील होऊ शकतो. कोकणातील रायगड, रत्नागिरी आणि सिंधुदुर्गमध्ये काही ठिकाणी मुसळधार पावसाची शक्यता आहे. या तीनही जिल्ह्यांना हवामान विभागाने यलो अलर्ट जारी केला आहे.

पश्चिम महाराष्ट्रातील पुणे, सातारा आणि कोल्हापूरच्या घाटमाथ्याला हवामान विभागाने ऑरेंज अलर्ट दिला आहे. तर पुणे, सातारा, सोलापूर, कोल्हापूर आणि सांगलीमध्ये काही ठिकाणी हलक्या ते मध्यम पावसाची शक्यता आहे.

उत्तर महाराष्ट्रातील नाशिक, अहिल्यानगर, धुळे, नंदुरबार आणि जळगावमध्येही काही ठिकाणी हलका ते मध्यम पाऊस होऊ शकतो.

मराठवाड्यातील छत्रपती संभाजीनगर, जालना, परभणी, हिंगोली, नांदेड या जिल्ह्यांमध्ये हलक्या ते मध्यम पावसाची शक्यता आहे.

तर संपूर्ण विदर्भामध्ये जोरदार पावसाची शक्यता आहे. विदर्भातील सर्व 11 जिल्ह्यांना हवामान विभागाने यलो अलर्ट जारी केला आहे. तर नागपूर, चंद्रपूर, भंडारा-गोंदिया आणि गडचिरोली या जिल्ह्यांमध्ये तुरळक ठिकाणी मुसळधार पावसाची शक्यता आहे.