Weather Alert: राज्यात पावसाचा जोर कायम, रविवारीही पाऊस झोडपणार, 15 जिल्ह्यांना अलर्ट

राज्यामध्ये मागील दोन-तीन दिवसांपासून पावसाचा जोर पाहायला मिळत आहे. दक्षिण महाराष्ट्र, उत्तर मध्य महाराष्ट्र, मराठवाडा आणि विदर्भाच्या काही भागांमध्ये जोरदार पाऊस झाल्याचे पाहायला मिळालं. पाहुयात 10 ऑगस्ट रोजी राज्यामध्ये हवामानाची स्थिती कशी असेल.

मुंबई शहर आणि उपनगरात ढगाळ आकाशासह हलक्या ते मध्यम पावसाची शक्यता आहे. त्यामुळे मुंबईतील कमाल तापमान 30 अंश सेल्सिअस तर किमान तापमान 26 अंश सेल्सिअस एवढं राहण्याची शक्यता आहे.

कोकणातील रत्नागिरी जिल्ह्याला हवामान विभागाने यलो अलर्ट दिला आहे, तर ठाणे, पालघर, रायगड आणि सिंधुदुर्ग जिल्ह्यात तुरळक ठिकाणी हलका ते मध्यम पाऊस होऊ शकतो.

पश्चिम महाराष्ट्रात कोल्हापूर, सातारा, सांगली आणि सोलापूर या चार जिल्ह्यांना हवामान विभागाने यलो अलर्ट दिला आहे. तर पुण्यामध्ये ढगाळ आकाशासह हलक्या ते मध्यम पावसाची शक्यता हवामान विभागाने वर्तवली आहे.

उत्तर महाराष्ट्रातील नाशिक, धुळे, जळगाव, नंदुरबार, अहिल्यानगर या जिल्ह्यात तुरळक ठिकाणी हलका ते मध्यम पावसाची शक्यता आहे.

तर मराठवाड्यातील सहा जिल्ह्यांना हवामान विभागाने यलो अलर्ट जारी केला आहे. जालना आणि छत्रपती संभाजीनगर वगळता लातूर, धाराशिव, बीड, परभणी, हिंगोली आणि नांदेड या सहा जिल्ह्यांना हवामान विभागाने यलो अलर्ट जारी केला आहे.

विदर्भातील बुलढाणा, अकोला आणि वर्धा, नागपूर या जिल्ह्यांना हवामान विभागाने यलो अलर्ट जारी केला आहे. पुढील काही दिवस राज्यात पावसाचा जोर कायम राहण्याची शक्यता हवामान विभागाने वर्तवली आहे.