'या' 11 गणपतींचं एकदा तरी घ्या दर्शन, एकाचा आहे शिवाजी महाराजांशी संबंध!

गणेशोत्सव अवघ्या काही दिवसांवर येऊन ठेपला आहे. सगळीकडे लाडक्या बाप्पाच्या आगमनाची तयारी आहे. महाराष्ट्रात अष्टविनायकांबरोबरच प्रत्येक गावाची आणि शहराची खास अशी गणेश श्रद्धास्थाने आहेत. प्रत्येक ठिकाणी त्यांची वैशिष्ट्ये निरनिराळी आहेत. अशा गणेश स्थानांविषयीची माहिती आज आम्ही तुम्हाला सांगणार आहोत.

<strong>मानाचा पहिला गणपती –</strong> कसबा गणपती हे <a href="https://news18marathi.com/pune/">पुण्याचं</a> ग्रामदैवत. या गणपतीची मूर्ती स्वयंभू आहे. शहाजी राजे यांनी 1636 मध्ये लालमहाल बांधला. त्यावेळी जिजाबाईंनी या मूतीर्ची स्थापना करून दगडी गाभारा बांधला.

मानाचा दुसरा गणपती - श्री तांबडी जागेश्वरी ही पुण्याची ग्रामदेवता. म्हणूनच तांबडी जोगेश्वरी गणपतीला मानाचं दुसरं स्थान प्राप्त झाल आहे. कसबा गणपतीप्रमाणं या गणेशोत्सवालाही 1893 पासून प्रारंभ झाला.

मानाचा तिसरा गणपती - गुरुजी तालीम मंडळाचा गणपती हा पुण्याचा मानाचा तिसरा गणपती. लोकमान्य टिळकांनी गणपतीचा उत्सव सुरू करण्यापूर्वी पाच वर्षे आधी या गणपतीचा उत्सव सुरू झाला. हिंदू-मुस्लिम ऐक्याचं प्रतिक म्हणून हा गणपती ओळखला जातो.

मानाचा चौथा गणपती - पुण्यातला मानाचा चौथा गणपती आहे तुळशीबागेतला गणपती. तुळशीबाग सार्वजनिक गणपती उत्सव मंडळाचा गणपती हा उत्कृष्ट देखाव्यासाठी प्रसिद्ध आहे. दक्षित तुळशीबागवाले यांनी 1900 साली या गणेशोत्सवाची उत्सव सुरुवात केली.

मानाचा पाचवा गणपती - पुण्यातला पाचवा मानाचा गणपती आहे केसरी गणपती. केसरी संस्थेचा हा गणेशोत्सव 1894 पासून सुरु झाला. पण 1905 पासून टिळक वाड्यात केसरी संस्थेचा उत्सव होऊ लागला.

मुंबई परिसरातील गणपती - मुंबईमधील अनेक गणपतींपैकी एक म्हणजे सध्या प्रख्यात असलेला प्रभादेवीजवळचा सिद्धिविनायक. लक्ष्मण विठू पटेल यांनी हे मंदिर 1801 मध्ये बांधल्याचा कागदोपत्री पुरावा सापडतो. मूळचे मंदिर तसे लहान आहे.

चिंचवड येथील मोरया गोसावी मंदिर - चिंचवड स्टेशनपासून सुमारे दोन किलोमीटर अंतरावर मोरया गोसावी मंगलमूर्तीचे मंदिर आहे. ही उजव्या सोंडेची गणेशमूर्ती आहे. महाराष्ट्रातील थोर गणेशभक्त मोरया गोसावी यांनी या गणेशाची स्थापना केली. हे एक जागृत गणेशस्थान आहे. 1655 मध्ये मोरया गोसावी यांनी येथे जिवंत समाधी घेतली. त्यानंतर 1659 मध्ये त्यांच्या चिरंजीवांनी येथे मंदिर उभारले.

कोल्हापूर शिरोळ तालुक्यातील गणेशवाडीचा गणपती - शिरोळ तालुक्यात कागलवाडजवळ कृष्णा नदीच्या काठी असलेले हे गणेशस्थान 56 विनायकांपैकी आहे असे म्हणतात.

साताऱ्याचा ढोल्या गणपती - साताऱ्यातील या गणेशाची मूर्ती आकाराने 10 ते 12 फूट उंच असल्याकारणाने त्याला ढोल्या गणपती म्हणतात. या गणपतीचे मूळ नाव मात्र &quot;ज्येष्ठराज' असे आहे. हे फार प्राचीन गणेश मंदिर आहे.

अहमदनगरमधील विशाल माळीवाडा गणपती - नगर शहराच्या दक्षिणेकडे माळीवाडा वेशीने आत जात असताना हे पुरातन गणेश मंदिर लागते. येथील गणेशमूर्ती 10 फूट उंच, उजव्या सोंडेची आहे. असे सांगतात की सुमारे साठेक वर्षांपूर्वी या गणेशमूर्तीला घाम आला होता. तेव्हा यज्ञयागादीक करून तो थांबविण्यात आला. तेव्हापासून हे मंदिर भक्तांमध्ये विशेष प्रसिद्ध पावले आहे.

विदर्भातील गणपती - यवतमाळहून वर्धा - नागपूरकडे जाणाऱ्या रस्त्यावर कळंबचा चिंतामणी आहे. हे स्थान विदर्भातील कदंबपूर म्हणून ओळखले जाते. गणपतीच्या 21 क्षेत्रांमध्ये हे स्थान गणले जाते.