पुणे : रविवारी रात्री 9.45 च्या सुमारास पुण्याच्या नाना पेठेमध्ये राष्ट्रवादीचे माजी नगरसेवक वनराज आंदेकरची हत्या करण्यात आली. दुचाकींवरून आलेल्या हल्लेखोरांनी वनराज आंदेकरवर पाच ते सहा राऊंड फायर केले, यानंतर त्याच्यावर कोयत्यानेही वार केले. हल्ल्यानंतर वनराज आंदेकरला केईएम रुग्णालयात नेण्यात आलं, पण तिथे त्याला मृत घोषित करण्यात आलं. पूर्व वैमनस्य आणि कौटुंबिक वादातून वनराज आंदेकरची हत्या करण्यात आली आहे.
advertisement
वनराज आंदेकरची हत्या त्याच्याच दोन बहिणी आणि दोन मेहुण्यांच्या मदतीने केल्याचा आरोप वनराजचे वडील बंडू आंदेकरनी केला आहे. पूर्व वैमनस्य असलेल्या सोमनाथ गायकवाडची मदत घेऊन कौटुंबिक वादातून बहिणी आणि मेहुण्यांनी वनराजच्या हत्येचा प्लान बनवला. दरम्यान सोमनाथ गायकवाडची काही रील आता सोशल मीडियावर व्हायरल होत आहेत. या रीलमध्ये सोमाभाऊ गायकवाड किंग ऑफ पुणे, असं लिहिण्यात आलं आहे. तसंच गळ्यात सोन्याच्या चेन आणि हातात सोन्याचं कड असलेला सोमनाथ गायकवाडचा फोटोही सोशल मीडियावर व्हायरल होत आहे.
सोमनाथ गायकवाडच्या टोळीतील आखाडेची वर्षभरापूर्वी हत्या झाली होती. या हत्येचा बदला घेण्यासाठी सोमनाथ गायकवाड टोळीने कोमकरांना सोबत घेऊन वनराजची हत्या केली आहे. वनराज आंदेकर हत्या प्रकरणी पोलिसांनी चार जणांना अटक केली आहे. यात आंदेकरचे मेहुणे गणेश कोमकर आणि जयंत कोमकर तसंच दोन सख्ख्या बहिणींचा समावेश आहे तर आणखी 6 आरोपींचा शोध पोलीस घेत आहेत.
एक दिवस आधीच वनराजच्या बहिणीने पोलीस ठाण्यातच पोलिसांसमोर वनराजला धमकी दिली होती. आम्ही तुला जगू देणार नाही, तुला आज पोरं बोलवून ठोकते अशा शब्दात धमकावलं होतं, यानंतर दुसऱ्याच दिवशी वनराज आंदेकरची हत्या करण्यात आली.
आंदेकर कुटुंबातील मुलगी लग्न करून कोमकर कुटुंबात दिली होती, वरून त्यांना घर आणि दुकानही चालवायला दिलं होतं, पण हे दुकान पुणे मनपाने अतिक्रमण कारवाईमध्ये पाडलं. यानंतर आंदेकर आणि कोमकर कुटुंबामध्ये वाद झाले, यानंतर हे वाद टोकाला गेले आणि अखेर वनराज आंदेकरची हत्या झाली, अशी माहिती पोलीस तपासात समोर आली आहे.