'चांगला नवरा करायचाय', दुसऱ्या लग्नासाठी विवाहितेकडून पोटच्या बाळाची हत्या, पुण्यातील खळबळजनक घटना

पूजा रवींद्र पवार असं अटक केलेल्या आरोपी महिलेचं नाव आहे. तर यश रवींद्र पवार असं हत्या झालेल्या चिमुकल्याचं नाव आहे. ही घटना शिरूर तालुक्यातील भांबर्डे गावात घडली असून मुलाचं वय अवघं अकरा महिने इतकं होतं. महिलेनं पोटच्या बाळाला घरासमोरील सिमेंटच्या ओट्यावर आपटून जीव घेतला आहे.

नेमकं प्रकरण काय?

शिरूर तालुक्यातील भांबर्डे गावाचे रहिवाशी रवींद्र अशोक पवार यांनी रांजणगाव MIDC पोलीस ठाण्यात आपल्या अकरा महिने वयाच्या मुलाचा मृत्यूची तक्रार दिली होती. या तक्रारीनंतर पोलिसांनी फिर्यादी रवींद्र पवार यांची पत्नी पूजा रवींद्र पवार यांची कसून चौकशी केली. सुरुवातीला तिने उडवाउडवीची उत्तरं दिल. मात्र पोलिसी खाक्या दाखवताच तिने गुन्ह्याची कबुली दिली.

advertisement

कोकण फिरून आल्यापासून बाळ सारखं रडत आहे. चांगला नवरा शोधून दुसरं लग्न करावं, असा विचार आपल्या डोक्यात आला होता. मूल सोबत असेल तर दुसरं लग्न करता येणार नाही. त्यामुळे हा अडथळा दूर करण्याच्या उद्देशाने स्वतःच्या मुलाचाच जीव घेतल्याचे व मृतदेहाची विल्हेवाट लावल्याचे कबूल केले.

आरोपी महिलेनं बाळाची हत्या केल्यानंतर बाळाचा मृतदेह एका काळ्या बॅगेत भरला होता. बॅगेत दोन मोठे दगड ठेवून तिने ही बॅग जवळच असलेल्या एका विहिरीत फेकून दिली. पोलिसांनी ही बॅग विहिरीतून बाहेर काढली असून मृतदेह ताब्यात घेतला आहे. तसेच आरोपी आईलाही अटक केली आहे. घटनेचा पुढील तपास पोलीस करत आहेत.