पुणेकरांनो सावधान! WhatsApp वापरताना एक छोटी चूक अन् खात्यातून साडेसात लाख रूपये गायब, काय घडलं?

नेमकी घटना काय?

परिमल नबकृष्ण परीडा (वय ३२, रा. शांतीनगर, भोसरी) यांनी याप्रकरणी भोसरी पोलीस ठाण्यात फिर्याद दिली आहे. परिमल हे व्यावसायिक असून त्यांचे भोसरी परिसरात दुकान आहे. १ जानेवारी रोजी सायंकाळी पाचच्या सुमारास अज्ञात सायबर चोरट्याने तांत्रिक कौशल्याचा वापर करून परिमल यांचे व्हॉट्सॲप खाते हॅक केले.

बँक खात्यावर डल्ला

advertisement

व्हॉट्सॲपचा ताबा मिळवल्यानंतर चोरट्याने परीडा यांच्या मोबाईलमधील गोपनीय माहिती आणि बँक तपशील शोधले. परिमल यांच्या पत्नीचे इंडियन ओव्हरसीज बँकेच्या भोसरी शाखेत 'करंट अकाऊंट' आहे. हॅकरने या खात्याची माहिती मिळवून अत्यंत शिताफीने ७ लाख ४१ हजार ६७१ रुपये वेगवेगळ्या ट्रान्झॅक्शनद्वारे स्वतःच्या खात्यावर वळवून घेतले. काही वेळातच खात्यातून एवढी मोठी रक्कम गेल्याचा संदेश आल्यावर परीडा कुटुंबियांना धक्का बसला.

पोलिसांकडून गुन्हा दाखल

आपली फसवणूक झाल्याचे लक्षात येताच त्यांनी तात्काळ पोलीस ठाणे गाठले. भोसरी पोलिसांनी अज्ञात संशयित आरोपीच्या विरोधात माहिती तंत्रज्ञान कायद्यानुसार (IT Act) गुन्हा दाखल केला आहे. सायबर सेलच्या मदतीने पोलीस आता ज्या खात्यांवर पैसे वळवण्यात आले आहेत, त्याचा माग काढत आहेत.