ते दोघं मित्र-मैत्रीण दुचाकीवर निघालेले; पण रस्त्यातच तिच्या डोळ्यादेखत नितीनला मृत्यूनं गाठलं, पुण्यात भयंकर घडलं

नेमकी घटना काय?

नितीन जुनवणे (वय १९, रा. धायरी फाटा) असे मृत तरुणाचे नाव आहे. नितीन आणि त्याची मैत्रीण हे दोघेही महाविद्यालयात शिक्षण घेत होते. गुरुवारी रात्री पावणे दहाच्या सुमारास ते दोघे दुचाकीवरून नवले पुलाकडून कात्रजच्या दिशेने निघाले होते. यावेळी मागून येणाऱ्या एका खासगी आराम बसने त्यांच्या दुचाकीला डाव्या बाजूने जोरदार धडक दिली.

advertisement

ही धडक इतकी भीषण होती की, नितीन रस्त्यावर फेकला गेला आणि गंभीर जखमी झाला. त्याला तातडीने जवळच्या रुग्णालयात नेण्यात आले, मात्र डॉक्टरांनी त्याला तपासून उपचारापूर्वीच मृत घोषित केले. या अपघातात त्याची मैत्रीणही जखमी झाली असून तिच्यावर उपचार सुरू आहेत. आपल्या डोळ्यादेखत मित्राचा झालेला शेवट पाहून तिला मोठा मानसिक धक्का बसला आहे.

बसचालक पसार

अपघातानंतर बसचालक भीतीपोटी घटनास्थळावरून पसार झाला आहे. याप्रकरणी जखमी तरुणीने दिलेल्या फिर्यादीवरून भारती विद्यापीठ पोलिसांनी बसचालकाविरोधात गुन्हा दाखल केला आहे. पोलीस उपनिरीक्षक प्रियांका निकम या प्रकरणाचा अधिक तपास करत असून, फरार चालकाचा शोध घेतला जात आहे.