पुणेकरांनो, तुमच्या घराची बनावट चावी इतर कोणाकडे तर नाही ना? पिंपरीतील ती घटना वाचून बसेल धक्का

भरदिवसा घरात 'लुटमार'

ही घटना शुक्रवारी (दि. ६ फेब्रुवारी) थेरगावमधील कैलासनगर परिसरात घडली. फिर्यादी देव विजय लोट (वय १९) हे नेहमीप्रमाणे सकाळी घराला कुलूप लावून कामासाठी बाहेर गेले होते. घर बंद असल्याची संधी साधून चोरट्याने बनावट चावीच्या साहाय्याने कुलूप उघडले आणि घरात प्रवेश केला. कपाटातील ७ ग्रॅम सोन्याचे दागिने, चांदीचे दागिने आणि ३० हजार रुपयांची रोकड, असा एकूण १ लाख २३ हजार रुपयांचा माल चोरट्याने शिताफीने लांबवला.

advertisement

ओळखीच्याच व्यक्तीवर संशय?

साधारणपणे घरफोडी करताना कुलूप तोडले जाते किंवा कडी उचकटली जाते. मात्र, येथे बनावट चावीचा वापर झाल्याने हे काम एखाद्या जवळच्या किंवा ओळखीच्या व्यक्तीचे असावे, असा प्राथमिक अंदाज व्यक्त होत आहे. याप्रकरणी राहुल हरीश हरिजन ऊर्फ लोट (वय २६, रा. थेरगाव, मूळ रा. राजस्थान) याच्यावर संशय व्यक्त करत गुन्हा दाखल करण्यात आला आहे.

दिवसाढवळ्या घडलेल्या या चोरीमुळे काळेवाडी परिसरात खळबळ उडाली आहे. काळेवाडी पोलीस सध्या या प्रकरणाचा अधिक तपास करत असून, बनावट चावी कशी बनवण्यात आली याचा शोध घेत आहेत. पुणेकरांनो, आपल्या घराची चावी कोणा अनोळखी व्यक्तीकडे किंवा सुरक्षित नसलेल्या ठिकाणी ठेवणे किती महागात पडू शकते, याचे हे ज्वलंत उदाहरण आहे.