पुणे हादरलं! मध्यरात्री सामाजिक कार्यकर्त्याचा पत्नीकडून निर्घृण खून, हत्येचं कारण समोर

नकुल भाईर यांचा खून

या घटनेत मृत झालेल्या व्यक्तीचे नाव नकुल भाईर (Nakul Bhair) आहे. नकुल भाईर हे केवळ सामाजिक कार्यकर्ते म्हणून नव्हते, तर शरदचंद्र पवार गटाच्या राष्ट्रवादी काँग्रेसमध्ये आणि विविध सामाजिक चळवळींमध्ये सक्रिय होते. चिंचवडगाव आणि पिंपरी-चिंचवड शहरातील नागरी समस्या, विशेषतः पाणी, रस्ते अशा अनेक प्रश्नांवर ते नेहमीच आग्रही भूमिका घेऊन लढत असत. त्यांचा पिंपरी-चिंचवड भागात मोठा जनसंपर्क होता. अशा एका लोकप्रतिनिधीत्वाच्या भूमिकेत असलेल्या कार्यकर्त्याची अचानक हत्या झाल्याने स्थानिक नागरिकांना मोठा धक्का बसला आहे.

advertisement

अनैतिक संबंधाच्या संशयातून हत्या

पोलिसांनी दिलेल्या प्राथमिक माहितीनुसार, ही घटना मध्यरात्री दोन वाजण्याच्या सुमारास चिंचवड परिसरातील त्यांच्या राहत्या घरी घडली. प्राथमिक तपासात, नकुल भाईर आणि त्यांची पत्नी चैताली भाईर यांच्यात गेल्या काही काळापासून कौटुंबिक वाद सुरू होते. नकुल हे पत्नी चैताली यांच्या चारित्र्यावर संशय घेत असत. या संशयावरून दोघांमध्ये अनेकदा मोठे खटके उडायचे.

कशी घडली घटना?

मिळालेल्या माहितीनुसार, घटनेच्या दिवशी, गुरुवारी रात्री उशिरा पती-पत्नीमध्ये पुन्हा याच अनैतिक संबंधाच्या संशयावरून जोरदार वाद झाला. हा वाद इतका विकोपाला गेला की, रागाच्या भरात पत्नी चैताली भाईर हिने क्रूर पाऊल उचलले. तिने कपड्याच्या सहाय्याने नकुल यांचा गळा आवळून त्यांची निर्घृण हत्या केली.

पत्नी पोलिसांच्या ताब्यात

ही धक्कादायक घटना उघडकीस येताच चिंचवड पोलिसांनी तात्काळ घटनास्थळी धाव घेतली. पंचनामा करून पोलिसांनी आरोपी पत्नी चैताली भाईर हिला ताब्यात घेतले आहे. सध्या तिची कसून चौकशी सुरू आहे. हत्येमागील नेमके कारण आणि घटनेच्या वेळी काय घडले याचा अधिक तपास चिंचवड पोलीस करत आहेत. एका सामाजिक कार्यकर्त्याचा त्याच्याच पत्नीकडून अनैतिक संबंधाच्या संशयातून खून झाल्याने शहरभर या घटनेची चर्चा आहे.