TRENDING:
नेमकी घटना काय?
मिळालेल्या माहितीनुसार, मंगल कुंभारकर या माळशिरस येथील पाटीलवस्ती परिसरात आपल्या मुलासोबत ज्वारीची कणसे मळणी यंत्रात टाकण्याचे काम करत होत्या. उन्हापासून संरक्षण व्हावे म्हणून त्यांनी डोक्याला स्कार्फ बांधला होता. मात्र, काम करत असताना अचानक हा स्कार्फ मशीनच्या फिरत्या चक्रात अडकला. मशीनचा वेग इतका प्रचंड होता की, मंगल यांना सावरण्याची संधीही मिळाली नाही आणि त्या थेट मशीनकडे ओढल्या गेल्या. त्यांचं डोकं मशीनमध्ये अडकलं. मशीन मालकाने तत्काळ यंत्र बंद करण्याचा प्रयत्न केला, परंतु तोपर्यंत उशीर झाला होता. या भीषण अपघातात मंगल यांचा जागीच अंत झाला.
advertisement
एकाच दिवशी दोन थरार
धक्कादायक बाब म्हणजे, याच दिवशी वनपुरी भागात दुसरी अशीच घटना घडली. चंद्रभागा मारुती कुंभारकर या देखील मळणी यंत्रात स्कार्फ अडकल्याने जखमी झाल्या. त्यांनी वेळीच प्रसंगावधान राखत स्कार्फ सोडवल्याने त्यांचा जीव वाचला, मात्र त्यांच्या डोक्याचे केस उपटले गेल्याने त्या गंभीर जखमी झाल्या आहेत.
या घटनेत रुग्णवाहिका चालक दत्तात्रय कुंभारकर यांची कर्तव्यनिष्ठा प्रकर्षाने दिसून आली. स्वतःची आई (चंद्रभागा) जखमी झालेली असतानाही, त्यांनी सामाजिक जबाबदारी ओळखून मंगल कुंभारकर यांचा मृतदेह जेजुरी ग्रामीण रुग्णालयात नेण्यासाठी तत्काळ रुग्णवाहिका उपलब्ध करून दिली. या घटनेमुळे शेतकरी महिलांनी यंत्रावर काम करताना विशेष काळजी घेण्याचे आवाहन प्रशासनाकडून करण्यात येत आहे.