या खेळाडूनं भारताच्या युवराजसिंगचं वर्ल्ड रेकॉर्ड मोडीत काढलं आहे. भारताचा माजी ऑल राउंडर खेळाडू युवराजसिंगच्या नावे आंतरराष्ट्रीय टी-20 क्रिकेटमध्ये सर्वात वेगवान अर्धशतक करण्याचा विक्रम होता. युवराजनं 12 बॉलमध्ये अर्धशतक झळकवण्याचा पराक्रम केला होता. मात्र, एशियन गेम्समध्ये नेपाळच्या एका खेळाडूनं केवळ 9 बॉलमध्ये अर्धशतक झळकवून क्रिकेटविश्वात खळबळ उडवून दिली आहे. 'झी न्यूज'नं या बाबत वृत्त प्रसिद्ध केलं आहे.

advertisement

दीपेंद्र सिंह आयरी असं या खेळाडूचं नाव आहे. त्याने युवराजसिंगचा विक्रम मोडला आहे. दीपेंद्रनं केवळ 9 बॉलमध्ये टी-20 मधील सर्वांत जलद अर्धशतक झळकवलं आहे. यादरम्यान त्यानं 10 बॉलचा सामना करून आठ सिक्सच्या मदतीनं नाबाद 52 रन केल्या. दीपेंद्रनं पहिल्या सहा बॉलमध्ये सहा सिक्स ठोकले. युवराजनं 2007मधील टी-20 वर्ल्ड कपमध्ये इंग्लंडविरुद्ध 12 बॉलमध्ये अर्धशतक केलं होतं. याच मॅचमध्ये युवराजनं स्टुअर्ट ब्रॉडच्या एका ओव्हरमध्ये सहा सिक्स मारले होते.

6-6-6-6-6-6-6-6-6-6-6-6 नेपाच्या खेळाडूचा नवा विक्रम, 20 बॉलमध्ये केलं शतक

नेपाळच्या खेळाडूनं केलं सर्वात वेगवान शतक

नेपाळचाच आणखी एक खेळाडू कुशल मल्लानं टी-20 क्रिकेटच्या इतिहासातील सर्वात वेगवान शतक झळकवण्याची कामगिरी केली आहे. कुशल मल्लानं भारतीय कॅप्टन रोहित शर्मा आणि दक्षिण आफ्रिकेचा बॅट्समन डेव्हिड मिलर यांचा विक्रम मोडला आहे. रोहित आणि डेव्हिडनं आंतरराष्ट्रीय टी-20 मॅचमध्ये 35 बॉलमध्ये शतक झळकवलेलं आहे. कुशल मल्लानं मंगोलियन टीमविरुद्ध अवघ्या 34 बॉलमध्ये शतक झळकवलं आहे. मल्लानं 50 बॉलमध्ये 8 फोर आणि 12 सिक्सच्या मदतीनं एकूण 137 रन केले.

आंतरराष्ट्रीय टी-20 मॅचमध्ये पहिल्यांदाच झाले 300 रन

या मॅचमध्ये मंगोलियन टीमनं टॉस जिंकून प्रथम बॉलिंग करण्याचा निर्णय घेतला. मंगोलियाविरुद्ध प्रथम बॅटिंग करताना नेपाळच्या टीमनं 20 ओव्हरमध्ये 3 गडी गमावून 314 रन केले. आंतरराष्ट्रीय टी-20 मॅचच्या इतिहासात एका इनिंगमधील ही सर्वात मोठी धावसंख्या आहे. आंतरराष्ट्रीय टी-20 क्रिकेटमध्ये 300 रनचा टप्पा पार करणारी नेपाळ ही पहिलीच टीम ठरली आहे.