T20 World Cup : हार्दिक पांड्याच्या एक वाक्यामुळे इशान किशन आज खेळतोय वर्ल्ड कप, काय म्हटला होता?

हार्दिक पांड्याने मदत केली

2024 मध्ये इशान किशनला बीसीसीआयच्या सेंट्रल कॉन्ट्रॅक्टमधून बाहेर काढण्यात आलं होतं. या कठीण काळातून सावरून आंतरराष्ट्रीय स्तरावर पुनरागमन करण्यासाठी त्याला हार्दिक पांड्याने मोठी मदत केली. मॅचनंतर ईशानने खुलासा केला की, जेव्हा तो संघातून बाहेर होता आणि टीकेचा धनी झाला होता, तेव्हा हार्दिकने त्याला अत्यंत मोलाचा सल्ला दिला होता.

advertisement

हार्दिकने ईशानला धीर दिला

2024 मध्ये जेव्हा ईशानचं बीसीसीआयसोबतच कॉन्ट्रॅक्ट संपलं, तेव्हा हार्दिक पांड्या स्वतः देखील कठीण टप्प्यातून जात होता. गुजरात टायटन्स सोडून मुंबई इंडियन्समध्ये आल्यानंतर त्याला प्रेक्षकांच्या रोषाला सामोरे जावं लागलं होतं आणि टी-ट्वेंटी कर्णधारपदही त्याच्याकडून गेलं होतं. अशा स्थितीत हार्दिकने ईशानला धीर दिला. "हे तुझ्या हातात आहे की तुला नकारात्मक विचार करायचा आहे की कठोर मेहनत करून धावा करायच्या आहेत," असा स्पष्ट संदेश हार्दिकने ईशानला दिला होता, जो त्याच्यासाठी टर्निंग पॉइंट ठरला, असं इशान म्हणतो.

पडद्यामागे खूप घाम गाळला

दरम्यान, हार्दिक पांड्याने ईशानच्या खेळाचे कौतुक करताना म्हटलं की, गेल्या दोन वर्षांपासून त्याने पडद्यामागे खूप घाम गाळला आहे. "संधी मिळत नसतानाही तू हसत राहिलास आणि हार मानली नाहीस, याचं मला खूप कौतुक वाटतं," असे हार्दिकने यावेळी नमूद केले. त्याने ईशानला एकच मंत्र दिला होता की, सकाळी उठून मेहनत करायची आणि रात्री शांत झोपायचं, हेच चक्र सुरू ठेवले की यश नक्की मिळतं. हार्दिकच्या या मार्गदर्शनामुळेच ईशानने आज मैदानात उतरून सर्वांना उत्तर दिलं आहे.