रोहितसारखा बिग हिटर पण पॅलेस्टाईनचा झेंडा लावून खेळला भारतीय खेळाडू, पोलिसांनी थेट मुसक्या आवळल्या; पाहा कोण?

फुरकान भट्ट नावाचा खेळाडू

जम्मू काश्मीरमधील क्रिकेट स्पर्धेतील एका मॅच दरम्यान फुरकान भट्ट नावाचा खेळाडू खेळत होता. या खेळाडूने आपल्या हेल्मेटवर पॅलेस्टाईन देशाचा झेंडा लावला होता. आधी कुणाच्याही ही बाब लक्षात आली नाही. परंतू व्हिडीओ व्हायरल झाल्यावर आता स्थानिक पोलिसांनी तातडीने तपास चक्र फिरवली आहेत. नियमानुसार मॅच खेळताना खेळाडूंना अशा प्रकारची चिन्हे वापरण्याची परवानगी नसते, त्यामुळेच आता या कृतीची सखोल चौकशी केली जात आहे. पोलीस या प्रकरणाकडे कायदा आणि सुव्यवस्थेच्या दृष्टीकोनातून पाहत आहे. हेल्मेटवरील पॅलेस्टिनी ध्वजावरून झालेल्या वादानंतर, भट्ट यांना जम्मू चॅम्पियन्स लीगमध्ये खेळण्यास बंदी घालण्यात आली आहे.

advertisement

झाहीद भट यांचीही चौकशी सुरू

या घटनेनंतर पोलिसांनी फुरकान भट्ट याला चौकशीसाठी पाचारण केले असून, हेल्मेटवर झेंडा लावण्यामागचा त्याचा नेमका हेतू काय होता, याबाबत जबाब नोंदवला जात आहे. केवळ खेळाडूच नाही, तर या लीगचे मुख्य आयोजक झाहीद भट यांचीही चौकशी सुरू झाली आहे. आयोजकांनी खेळाडूंच्या किट आणि ड्रेस कोडबाबत कोणते नियम लावले होते आणि ही घटना घडत असताना कोणाचे लक्ष का गेले नाही, असे अनेक प्रश्न उपस्थित केले जात आहेत. कायदेतज्ज्ञांच्या मते, जर कोणत्याही कृतीमुळे सार्वजनिक शांतता, कायदा आणि सुव्यवस्था किंवा सामाजिक सौहार्द बिघडत असल्याचा संशय असेल, तर पोलिसांना चौकशी करण्याचा आणि कारवाई करण्याचा अधिकार आहे.

क्रीडा वर्तुळात रंगली चर्चा

जम्मू-कश्मीर पोलीस आता या प्रकरणाचा तांत्रिक आणि कायदेशीर बाजूंनी अभ्यास करत असून, गरज पडल्यास कडक कारवाई करण्याचे संकेत देण्यात आले आहेत. मैदानावर स्पोर्ट्समन स्पिरिट राखणे महत्त्वाचे असते, मात्र अशा वादांमुळे खेळाचे वातावरण बिघडण्याची चर्चा सध्या क्रीडा वर्तुळात रंगली आहे. पोलीस लवकरच या प्रकरणी आपला अंतिम अहवाल सादर करण्याची शक्यता आहे.

कोण आहे फुरकान भट?

दरम्यान, जम्मू आणि काश्मीरचा तरुण क्रिकेटपटू फुरकान भट हा स्थानिक क्रिकेटपटू आहे जो जम्मू आणि काश्मीर चॅम्पियन्स लीगमध्ये खेळतो. ही लीग काश्मीर खोऱ्यात क्रिकेट उत्साह वाढवण्यासाठी एक स्थानिक स्पर्धा आहे. फुरकान भट हा रोहित शर्मासारखा बिग हिटर मानला जातो. क्रिकेट खोऱ्यात नेहमीच लोकप्रिय राहिले आहे. परवेझ रसूल आणि उमरान मलिक सारखे खेळाडू येथून उदयास आले आहेत आणि राष्ट्रीय स्तरावर चमकले आहेत. फुरकान सारखे स्थानिक खेळाडू देखील हे स्वप्न जगतात.