IPL 2026 आधी महेंद्रसिंग धोनीला आली नोटीस, फक्त 15 दिवसांची मुदत; काय काय आहेत आरोप?

धोनीला कुणी पाठवली नोटीस?

झारखंड स्टेट हाऊसिंग बोर्डाने धोनीला एक अधिकृत नोटीस बजावली असून, ही नोटीस रांचीमधील हरमू परिसरातील एका निवासी प्लॉटशी संबंधित आहे. H-10A क्रमांकाच्या या प्लॉटबाबत बोर्डाने गंभीर आक्षेप नोंदवले असून, नियमांचे उल्लंघन झाल्याचा दावा केला आहे. हाऊसिंग बोर्डाच्या आरोपांनुसार, संबंधित प्लॉट केवळ राहण्याच्या उद्देशाने देण्यात आला होता.

advertisement

धोनीने पॅथॉलॉजी लॅब चालवली?

मात्र, सध्या त्या ठिकाणी कथितरीत्या एक पॅथॉलॉजी लॅब चालवली जात असल्याची माहिती समोर आली आहे. निवासी क्षेत्रात व्यावसायिक उपक्रम राबवणे हे वाटप नियमांच्या अटींचे थेट उल्लंघन असल्याचे बोर्डाचे म्हणणे आहे. या प्रकरणी धोनीकडून स्पष्टीकरण मागवण्यात आले असून प्रशासकीय वर्तुळात खळबळ उडाली आहे.

थाला धोनीला 15 दिवसांची मुदत

बोर्डाने आपल्या नोटिशीमध्ये स्पष्ट केले आहे की, जर 15 दिवसांच्या आत समाधानकारक उत्तर मिळाले नाही, तर या प्लॉटचे वाटप रद्द करण्याची शिफारस केली जाऊ शकते. हाऊसिंग बोर्ड सध्या अशा सर्व प्रकरणांची चौकशी करत आहे, जिथे निवासी जागांचा वापर कमर्शियल कामांसाठी केला जात आहे. नियमांचे उल्लंघन कोणासाठीही खपवून घेतले जाणार नाही, असा इशारा अधिकाऱ्यांनी दिला आहे.

रांचीच्या रिंग रोडवर फार्महाऊस

दरम्यान, धोनी सध्या हरमू येथील या घरात राहत नसून, त्याने रांचीच्या रिंग रोडवर स्वतःचे मोठे फार्महाऊस बांधले आहे. तो जेव्हा रांचीमध्ये असतो, तेव्हा याच फार्महाऊसवर मुक्कामाला असतो. दरम्यान, एका सार्वजनिक कार्यक्रमात मुख्यमंत्र्यांनी धोनीचे कौतुक करताना त्याला झारखंडचा अभिमान म्हटले होते, मात्र आता सरकारी बोर्डाच्या या कारवाईमुळे सर्वांच्या नजरा धोनीच्या उत्तराकडे लागल्या आहेत.