वकील झाली तरी कोर्टाची पायरी चढली नाही; अलिबागमधील 24 वर्षीय तरुणी बनली यशस्वी व्यावसायिक, VIDEO

अलिबाग : अनेक जण वकिलीचे शिक्षण घेतल्यानंतर मोठे वकील बनतात. मात्र, एका तरुणीने वकिलीचे शिक्षण झाल्यानंतर कुठेही नोकरी वगैरे न करता थेट आपल्या बालपणीची आवड जोपासत व्यवसाय करण्याचा निर्णय घेतला. आज ही तरुणी एक यशस्वी व्यावसायिक बनली आहे. जाणून घेऊयात, 24 वर्षांच्या तरुणीची ही प्रेरणादायी कहाणी.

अलिबागमध्ये बामणोली या गावामध्ये एक तरुणी चॉकलेटच्या मोदकांचा आणि ड्रायफ्रूट मोदकांचा व्यवसाय करते. अ‍ॅडव्होकेट स्वरांगी टोळकर असे या तरुणीचे नाव आहे. इतर वेळेस ती हे पदार्थ बनवतेच पण गणेशोत्सवामध्ये तिने तयार केलेल्या मोदकांना अधिक मागणी आहे. अलिबागमध्ये तिचे चॉकलेट, मोदक हे प्रत्येक दुकानामध्ये मिळतात. वकिलीचे शिक्षण झाल्यानंतर तिने कुठेही जॉब न करता हा चॉकलेटचा व्यवसाय सुरू केला. गणपतीत तिच्या शॉपमधील साधारण 11 मोदकांचे 700 ते 800 बॉक्स विकले जातात.

स्वरांगी ही गेल्या 5 वर्षांपासूनच केक आणि चॉकलेट बनवते. कॉलेजमध्ये असतानाच तिने चॉकलेट मोदक बनवायला सुरुवात केली. सुरुवातीला आवड म्हणून सुरू केलेला हा व्यवसाय आता भरभराटीस पोहचला आहे. स्वरांगी गणेशोत्सवामध्ये 11 चॉकलेटच्या मोदकांचा बॉक्स 100 रुपयांना आणि 21 मोदकांचा बॉक्स 180 रुपयांना विकते. या चॉकलेटचा मोदकांना गणेशोत्सवाच्या महिन्यात तर मागणी आहेच. मात्र, इतरही दिवसात लहान मुलांसाठी पालक तिच्याकडून हे खरेदी करतात.