खोकल्यावर रामबाण मध! शुद्ध आहे की भेसळयुक्त, ओळखायचं कसं?

भोपाळ, 6 डिसेंबर : आयुर्वेदात प्राचीन काळापासून मधाचा वापर केला जातो. मधमाशांद्वारे फुलांमधून काढला जाणारा हा गोड, चिकट पदार्थ विविध आजारांवर अत्यंत गुणकारी असतो.

आयुर्वेद विशेषज्ज्ञ डॉक्टर सौरभ सिंह राजपूत यांनी दिलेल्या माहितीनुसार, नुसतं मध खाल्लं किंवा एखाद्या पदार्थात मध घालून खाल्लं तरी त्याचा आरोग्याला विशेष फायदा होतो. फक्त मध खाण्यापूर्वी ते शुद्ध आहे की त्यात इतर कोणत्या पदार्थांची भेसळ आहे, याची खात्री करून घ्या. कारण भेसळयुक्त मध खाल्ल्यास ते शरिरासाठी हानीकारक ठरू शकतं.

शुद्ध मध जाडसर असतं. पाण्यात घातल्यावर ते सहजरित्या मिसळत नाही, तर तळाशी जाऊन एकत्र होतं. याउलट भेसळयुक्त मध अगदी सहजपणे पाण्यात मिसळतं. मधात भरपूर प्रमाणात पोषक तत्त्व, खनिजं आणि जीवनसत्त्व असतात. त्यांचा फायदा मिळवण्यासाठी शुद्ध मध खाणं अनिवार्य आहे.

मधात प्रामुख्याने फ्रक्टोज असतं. यात कार्बोहायड्रेट, रायबोफ्लेविन, नायसिन, जीवनसत्त्व बी-6, सी आणि ऍमिनो ऍसिड आढळतं. चमचाभर मधात जवळपास 64 कॅलरी आणि 17 ग्रॅम शुगर (फ्रक्टोज, ग्लुकोज, सुक्रोज, माल्टोज) असते. तर, मधात फॅट, फायबर आणि प्रोटीन अजिबात नसतात.