व्वा सरकार! तटकरेंचा आग्रह, अमित शाहांच्या जेवणासाठी जनतेच्या पैशातून १ कोटी ३९ लाखांचं हेलिपॅड, दमानिया संतापल्या

अमित शाह यांच्या रायगड दौऱ्यासाठी शासन आणि प्रशासनाने जय्यत तयारी केली होती. रायगडवरून २० किमी अंतरावर असलेल्या सुतारवाडीत गृहमंत्री शाह हेलिकॉप्टरने गेले. शाह यांच्यासाठी सुतारवाडीत बनविलेल्या ४ हेलिपॅडसाठी शासनाने १ कोटी ३९ लाखांचे कंत्राट (टेंडर) काढले होते. दैनिक 'मीड डे' या वर्तमानपत्रात ९ एप्रिल रोजी हे कंत्राट (टेंडर) छापून आले होते. तटकरे यांच्या आग्रहासाठी आणि शाह यांच्या जेवणासाठी जनतेच्या पैशांची उधळपट्टी का करण्यात आली? असा सवाल अंजली दमानिया यांनी केला आहे.

जनतेच्या कष्टाने कमवलेल्या कराच्या पैशातून तटकरेंसाठी खासहेलिपॅड? अमित शाह यांची भेट वैयक्तिक होती. तो भार सरकारी तिजोरीवर कशासाठी? अमित शाहांना जेवायला घालायचंय तर खुशाल घाला. सोन्याच्या ताटात घालायचंय तरी घाला. ते आमच्या कष्टाच्या पैशाने कशासाठी? असा सवाल करीत तटकरेंच्या अफाट कंपन्या आहेत ना मग त्यांनी वैयक्तिक खर्च करावा, अशा शब्दात दमानिया यांनी आपला संताप व्यक्त केला आहे. देवेंद्र फडणवीसांचे अभिनंदन करीत सिंचन घोटाळा विसरून नवीन सरकारमध्ये खूपच चांगला ताळमेळ जाणवतोय, असा सणसणीत टोलाही त्यांनी लगावला आहे.