चाकणकरांच्या कथित कॉल रेकॉर्डिंगवरून अंधारे-दमानियांमध्ये जुंपली, दोघींकडूनही एकमेकांवर फायरिंग!

मुंबई : नाशिकचा भोंदूबाबा अशोक खरात याचे राजकीय कनेक्शन समोर आल्यानंतर त्याला कुणी कुणी फोन केला, तो कुणाच्या संपर्कात होता, याची माहिती देण्यासाठी सामाजिक कार्यकर्त्या अंजली दमानिया यांनी त्याचे नेत्यांबरोबरचे कथित 'सीडीआर' समोर आणले. या सीडीआरमध्ये रुपाली चाकणकर, प्रतिभा चाकणकर, एकनाथ शिंदे, दीपक केसरकर, चंद्रकांत पाटील, आशिष शेलार आदी नेत्यांची नावे होती. मात्र दमानियांकडे ही माहिती कुठून आली? असा सवाल संजय राऊत आणि सुषमा अंधारे यांनी उपस्थित केला. जी माहिती एसआयटीकडे नाही, ती माहिती दमानिया यांच्याकडून कुठून येते? असा प्रश्न त्यांनी विचारला. त्यावर उत्तर देताना अंजली दमानिया यांनी एआय टूल वापरून कॉल रेकॉर्ड डिटेल्स काढल्याचे सांगितले. खरात प्रकरणातल्या कथित कॉल रेकॉर्डवरून सुषमा अंधारे आणि अंजली दमानिया यांच्यात शा‍ब्दिक वाकयुद्ध रंगले आहे.